FEPUELI 14 TU’APULELULU

KO E ‘OFA ‘A E ‘OTUA

Folofola ke lau : Loma 8:35-39
Veesi Tefito : Loma 8:35,37-39

“Ko hai tü ha taha te ne motuhi kitautolu mei he ‘ofa ‘a Kalaisi? ‘A mamahi?’A faingata’a? ‘A fakatanga? ‘A honge? ‘A takapë? ‘A tu’utamaki? ‘A heletä? ‘Ikai: ka ‘i he ngaahi me’a ni kotoa pe ‘oku tau ikuna noa pe ‘iate ia ne ne ‘ofa’i kitautolu. Seuke, ‘oku te tui ‘e ‘ikai lava ‘e he mate, p ko e mo’ui, pe ko ha kau ‘angelo, pe ko ha kau pule, pe ko e ngaahi me’a ‘oku lolotonga ni, pe ko ho ngaahi me’a ka hoko mai, pe ko ha ngaahi malohi, pe ko ha ma’olunga, pe ko ha loloto, pe ko ha me’a ‘e taha ‘i Natula, ‘e ‘ikai te ne lava ke motuhi kitautolu mei he ‘ofa ‘a e ‘Otua, ‘a ia ‘oku ‘ia Kalaisi Sisu ko hotau ‘Eiki.” (Loma 8:35,37-39)

Kainga ‘oku meimei ko e me’a kotoa pe ‘i he mo’ui ‘e malele pe ke liliu pe fetongi ‘o ‘ikai ke tau hanga ‘etautolu ‘o fakatokanga’i. Ko ho kaume’a ‘e hoko ‘i he taimi ‘e taha ko ho fili. Ko ho famili ‘e mavahe ia meiate koe. Ko ho’o mo’ui ‘e ‘alu. ‘E mole ho ngaue. ‘Oku ‘ikai ha toe me’a ‘e tatau ai pe ai pe. Ka ko e me’a pe ‘e taha. Pea ko e me’a ko ia ‘e taha ko e me’a ia te ke falala ki ai ‘i he taimi ni pea a’u atu ‘o ta’engata pea ta’engata ka ko e ‘ofa ta’e ‘osi ‘a e ‘Otua.

‘Oku ‘ikai ha toe me’a te ke toe lava ‘o fai, pea ‘oku ‘ikai ke toe ‘i ai ha feitu’u ia te ke toe lava ‘o ‘alu ki ai he ‘ikai te ke ta’e ‘ilo ai ‘a e ‘ofa ‘a e ‘Otua. Na’e feinga ‘a e Aposetolo ko Paula ke ne fakakaukau’i ha founga ‘e faifaiange ai kuo ‘ikai ke toe fe’unga pe toe malava ke e’a ai ‘a e ‘ofa ‘a e ‘Otua. Pea a’u pe ‘a Paula ki he me’a ko ‘eni hono faka’osinga kuo ‘ikai ke ne ma’u ha me’a ke fakamavae ai ‘a e ‘ofa ‘a e ‘Otua meiate kitautolu.

Tatau pe pe ko e ha ‘a e tukunga ‘o e me’a ‘oku ke ‘i ai ‘i he taimi ni. Pe ‘oku ke mo’ui lelei pe ‘oku ke mamahi mei he mahaki. Ngaue pe ta’e ngaue. Pe kuo ke hili’angongo ‘i he fiefia ‘i he mamani ‘o e mamani ko ‘eni, pe kuo ke ha’ulu ki lalo ko e ta’eikuna, pe ‘oku ke mo’ui he mo’ui fakakalisitiane ‘oku ikuna, pe ‘oku ke fepaki mo e ngaahi nunu’a ‘o e angahala. Tatau ai pë pe ko e ha, tatau ai pë pe ko e ha. ‘Oku ‘ofa ‘a e ‘Otua kiate koe.

Ko e ‘ofa ‘a e ‘Otua ‘oku ‘ikai ke liliu ia ‘i ho ‘atakai pë ko e ha ‘a e fa’ahinga me’a ‘oku hoko. ‘Oku kei tu’u ai pe ‘a ‘ene ‘ofa ‘ana ia. Pea ‘oku ‘ikai ke fakafalala ia ‘i ho ‘atakai ‘o’ou. ‘Oku tu’uma’u pe ia pea ‘oku ta’emaliliua, pea a’u ki he fanga tevolo ‘oku ‘ikai ke nau lava ‘o ta’ofi ‘a e ‘ofa ‘a e ‘Otua meiate koe. ‘Oku ‘ikai ke fakafäfä’u ‘a e ‘ofa ia ‘a e ‘Otua ho ngaahi palopalema pe ko ho ngaahi tonounou. Kapau leva ‘oku ‘i ai ha ngaahi me’a ‘oku fakamahino mai ‘e he tohitapu. Ka ko ‘eni pe ‘oku ‘ofa mo’oni ‘a e ‘Otua ki he’ene fanau. Ko hono ‘uhinga ia ‘a e kalanga ‘aki ‘e he toko taha fa’u Saame. “Fakafeta’i kia Sihova, he ‘oku lelei Ia, He ‘oku tolonga ‘o ta’engata ‘ene  ‘alo’ofa.” (Saame 106:1)

‘I ai ‘a e taimi ‘e taha ‘oku ke ongo’i pea a’u pe ki ho’o fakakaukau ‘oku ‘ikai ke toe malava ‘e he ‘Otua ke ‘ofa ‘ia koe. ‘Oku ke sio ki ho ‘atakatakai pea ke ofo ko e ha e me’a ‘e lava ai ha ‘Otua ‘ofa ‘o faka’atä koe ke ke fou ‘i ha ngaah taimi faingata’a pehe fau.

Hanga ma’u pe ‘o manatu’i ko ho’o tu’unga fakakaukau ‘oku ‘ikai ko e me’a ia ‘oku ne hanga ‘o fakapapau’i ‘a e ‘ofa ‘a e ‘Otua ‘ia koe. Pea he ‘ikai ‘aupito ko ‘ene ‘ofa ‘oku fakapapau’i ia ‘e ho tukunga mo e fa’ahinga me’a ‘oku ke ‘i ai. Ko e ‘ofa ia ‘a e ‘Otua ko e me’a ia ‘e taha ‘i he mo’ui te ke matu’aki falala ki ai, pea fakatefito ho’o hao ‘i he fo’i mo’oni ta’emaliliu ko ia. Hala’atä ha me’a te ne lava ‘o fakamavae koe mei he ‘ofa ‘a e ‘Otua. Pea ko e palomesi ia te ke kuku ki ai.

TEFITO’I FAKAKAUKAU : Fiefia mo ke hakailangitau he ‘oku ‘ikai ke maliliua ‘a e ‘ofa ia ‘a e ‘Otua ‘ia koe, he ko ‘ene fanau koe. Ko ia lototo’a pea ke pikitai ki he ‘ofa ‘a e ‘Otua ‘o falala ki ai.

Be the first to comment on "FEPUELI 14 TU’APULELULU"

Leave a comment

Your email address will not be published.


*