FEPUELI 15 FALAITE

KO E ‘OFA

Folofola ke lau : 1 Kolinito 13:1-8
 
Veesi Tefito : 1 Kolinito 13:4-8

“Ko ‘Ofa ‘oku ne angamokomoko, mo angalelei. Ko ‘Ofa ‘oku ‘ikai te ne meheka, ‘oku ‘ikai te ne fai pe ke ongoongoa, ‘oku ‘ikai te ne fakafuofuolahi. ‘Oku ‘ikai te ne fai ta’etaau, ‘oku ‘ikai te ne kumi ‘ene lelei ‘a’ana, ‘oku ‘ikai te ne faka’ita, ‘oku ‘ikai te ne lau ‘a e kovi. ‘oku ‘ikai te ne fiefia ‘i he ta’etotonu, ka ‘oku ne kaung fiefia mo e Mo’oni. ‘Oku ne ukuma ‘i he me’a kotoa pe, ‘oku ne tui ‘i he me’a kotoa pe, ‘oku ne ‘amanaki ‘i he me’a kotoa pe, ‘oku ne kataki ‘i he me’a kotoa pe. Ko ‘Ofa ‘oku ‘ikai ke ka’anga ‘i ha taimi, Ka neongo ko e malanga-palofisai, ka ‘e hoko ‘o ta’e’aonga, neongo ko e fai’aki ‘a e ngaahi lea, ka ‘e faifai ‘o tuku ia, neongo ko e ‘ilo loloto, ka ‘e hoko ‘o ta’e’aonga.” (1 Kolinito 13:4-8)

Kainga ko e palopalema ki he ‘ofa ko e ‘uhinga ko e tokolahi ‘a e kakai ‘oku ‘ikai ‘aupito ha’anau mahino’i ko e ha ‘a e ‘ofa. Ko e ‘ofa ‘oku ‘ikai ko ha ongo ka ko e fo’i laumalie. Pea ‘oku fakatefito ‘a e ‘ofa ‘i he fa’ahinga laumalie ‘oku ‘i loto ‘iate koe ‘o hange ko e me’a ‘oku ‘i he mamani ko ‘eni. ‘O ne fakatupu ‘e ia ha fa’ahinga mamahi ‘oku ta’e lava ke tau hanga ‘o fua ‘i he tokolahi ‘o e kakai ‘i he’enau mo’ui.

‘Oku hange ko ha langa ha fu’u fale ‘i he ‘one’one ‘i he mat tahi. Hange pe ‘oku ‘asi fefeka mo ‘asi malohi ka ko e taimi ko é ka hoko mai ai ‘a e hu’a ‘a e tahi, ‘oku ‘ikai ke fe’unga ‘a ho fale ko ia ‘i he ‘one’one ke ne hanga ‘o pukepuke. Ko ia ‘e ha’u pe ‘a e peau ‘o ne hanga ‘o fufulu atu ia ‘o ma’a.

Ko e ngaahi ongo (feelings) ‘oku nau ha’u pea nau ‘alu. Pea ‘oku tau a’usia ha fa’ahinga ‘aho ‘oku faka’ofa ‘i he’etau mo’ui. Pea ‘oku mahino ‘aupito ‘oku fakatefito ‘i he anga ‘o ‘etau vä pea mo e anga ‘o ‘etau feohi tu’uma’u ‘oku fa’u ia ‘i he fa’ahinga ongo (feelings) ‘oku tau fai, pea ‘oku ne fa’a lohiaki’i ‘e ia ‘akitautolu, pea ‘oku tau tö ai ki he fakatu’utamaki. Ko ia ‘oua te ke falala pe te ke nofo ‘i he me’a ‘oku ke ongo’i. He ‘oku fa’a käkä’i koe ia ai ‘e Setane.

Ko e matu’a ko é ‘oku ‘ofa ‘i he’enau fanau, ko e lau pe ‘a e ‘ofa ‘i he te’eki ke nau ‘ita pea ko e matu’a kovi ia. Ko e kaume’a ko é ‘oku lototö mo faitotonu ko ‘ene kei peh p he ‘ikai ke ne hanga ‘o ‘omai ha me’a’ofa ma’ana, pe ko ha’ane fa’ahinga koloa. Pea ‘oku ‘ikai leva ke kei hoko ia ko e kaume’a. Hange ha ‘ofa sio me’a. Ko e husepaniti ko é ‘oku ne li’aki hono uaifi mo ‘ene fanau, koe’uhi he ‘oku ne ‘ilo ‘e ia ha toe fefine ‘oku toe faka’ofo’ofa mo talavou ange. Kuo mole leva mei ai ‘a e poini ia ‘o e nofo mali.

‘Oku hanga ‘e mamani ‘o foaki ‘a e me’a ‘oku ui ko e ‘ofa ko ha fa’ahinga me’a ke ne tohoaki tokanga ‘o fokotu’utu’uniu, mo ne tohoaki mai ‘a e tokanga ‘a e kakai. Hele’uhila, ko e hiva, mo e ngaahi tohi ‘o fekau’aki pea mo e ‘ofa, ‘oku ne ‘omi ‘e ia ha lau’i piliona ‘o e pa’anga ki he pule’anga. Kae kehe ko e palopalema ko e ‘ofa ‘oku foaki ia ko ha me’a ke tau tu’ulu ki ai, pea tau tö ki tu’a ai.

Be the first to comment on "FEPUELI 15 FALAITE"

Leave a comment

Your email address will not be published.


*