EPELELI 15 MONITE

KO E NGAAHI NGAUE LELEI

Folofola ke lau : 1 Timote 5:17-25

Veesi Tefito : 1 Timote 5:24-25

‘Oku fu’u e’a ‘a e angahala ‘a e kakai ’e ni’ihi, ‘o mu’a ki he fakamäu, kae kimui ‘a e angahala ‘a e ni’ihi. Pehe foki ‘oku fu’u e’a ‘enau ngaahi ngaue lelei; pea ko e ngaahi ngaue ‘oku ‘ikai pehe, tala’ehai ‘e lava ke fufü.” (1 Timote 5:24-25)


Ko e ‘aho kotoa pe ‘oku tau fa’a fanongo ki he ngaahi loi mo e ta’emo’oni. Te ke lava ‘o fai ha me’a ‘oku fehalaaki pea ‘ikai ke ‘i ai ha taha ia te ne ‘ilo ki ai.

Pehe ‘e he fakamatala ‘a e ngaahi ongoongo, ‘oku ‘i ai ‘a e fu’u maea ta’e ‘i ai hano ngata’anga ‘o e kākā mo e kaiha’a ‘oku tau fehangahangai mo ia faka’aho. Pea ‘oku hoko pe ‘a e kākā mo e kaiha’a ‘i hotau lotolotongá ‘i he ngaahi kakai ‘oku nau fakakaukau ‘oku nau faiangahala pe kinautolu ia kae he ‘ikai pe ke ‘ilo ia. Pea ‘oku ‘i ai pe ‘a e ngaahi me’a ‘oku tau fai pe ‘o fa’a fufü pea tau pehe ‘oku ‘ikai ke ‘ilo ia ‘e ha taha.

Ko e angahala kotoa pe ‘oku kamata ‘aki ‘a e loi mo e fufü, loi ‘i he’etau fakakaukau pea fufü ai pe ‘i he’etau ngaahi fakakaukau ke ‘oua ‘e ‘ilo pea tokua ‘oku ‘ikai ko e angahala ia pea puli ai pe ia, ka ko e angahala ka ‘oku puli pea ‘ikai ke e’a.

Talaange ‘e Paula kia Timote ko e ngaahi ngaue lelei ‘e toe fakae’a pe mo ia. ‘I he taimi ‘oku tau feinga ai ke tau fai ha ngaue lelei ‘o fai fakapulipuli, kae ‘e ‘ilo pe ia he ‘e fai pe pea ‘ilo ‘e he kakai. Taimi ‘e taha ‘oku fu’u vave pea taimi ‘e taha ‘oku toki ‘ilo pe he mate ‘a e toko taha ko ia. Ko ‘ene anga’ofa mo ‘ene nima homo ‘e e’a leva ia ai.

Kae kehe ko e taupoto taha ko e me’a kotoa pe na’a tau fai tatau pe pe ko e lelei pe ko e kovi, kuo pau pe ke ‘aliaki ia ki mu’a he taloni ‘o e ‘Otua ‘o e ‘Univeesi (2 Kolinito 5:10). Pea ko e taha ia ha fakakaukau ‘oku ne hanga ‘o li kita ki lalo ke te fai fai fai ‘ete fufü mo ‘ete fai ‘a e ngaahi me’a fakapulipuli, ka ko ‘ene a’u ki he ‘aho ko ia ‘e fakalea mai ‘a hotau fakamaau’i ‘o fakatatau ki he ngaahi kovi kotoa pe mo e ngaahi lelei kotoa pe na’a tau fai.

Me’a ni nai ‘oku fa’a ma’u hala koe ‘oku lava pe ke ke faiangahala pea ‘ikai lava ‘o ‘ilo? Manatu’i ‘a e ngaahi veesi ko ‘eni. ‘Oku folofola mai ‘a e ‘Otua kuo pau pe ke ‘ilo koe. ‘Oku ke fa’a fai nai ha ngaue lelei pea ke ongo’i kiate koe ‘oku ke loto lavea he ‘oku hangehange ‘oku ‘ikai ke fakatokanga’i ho’o ki’i ngaue lelei ke fakamalo’ia, ‘oua te ke hoha’a koe ki ai. He ‘e hokosia mai ‘a e taimi ko e ngaahi ngaue lelei kotoa pe na’e fai, kuo pau ke fakae’a ia ‘i he ‘ao ‘o e ‘Otua, he ‘oku faitotonu mo haohaoa ‘a e ‘Otua. Te ne hanga ‘o fakapale’i koe ‘i ho’o ngaue lelei. Manatu ma’u pe ‘oku sio ‘a e ‘Otua pe ‘afio ‘a e ‘Otua ki he me’a kotoa pe kotoa pe, ‘oku ‘ikai ha me’a ‘e fufuu meiate Ia.

‘Oku te faka’amu ‘i he’etau ‘ilo ‘a e ‘ulungaanga ko ia ‘a e ‘Otua (tapu mo ia) ‘oku ‘ikai ha me’a ‘e fufü kiate Ia, ‘oku totonu ia ke kamata ‘aki ia ‘ene ngaue ‘iate kitautolu ke tau fekumi ke tau nofo ‘i he mo’ui ma’oni’oni mo ma’a, pea tau fai ‘a e ngaue lelei kotoa pe ‘o ‘ilo’ilopau ‘oku ‘ikai ‘ilo mai ‘e he kakai kehe, ka ‘oku ‘afio mai pe ‘a e ‘Otua ia ki ai.

TEFITO’I FAKAKAUKAU: ‘Oua ‘aupito na’a ke fakakaukau pe te ke ma’u hala he mo’ui ‘e ‘i ai ha’o me’a ‘e fufü, tatau pe kovi mo e lelei pea mei he ‘Otua. ‘Oua te ke tokanga koe ia pe ‘ilo ‘e ha taha ka ke faifaiangahala pe, pe te ke tokanga koe ke fakamälö’ia mai ho’o ngaue lelei. ‘Oku ‘osi ‘afio’i ‘e he ‘Otua ‘a e me’a kotoa pe kotoa pe.

Be the first to comment on "EPELELI 15 MONITE"

Leave a comment

Your email address will not be published.


*