EPELELI 18 TU’APULELULU


TAU ‘A E TAU LELEI


Folofola ke lau : 1 Timote 6:11-16
Veesi Tefito : 1 Timote 6:12


“Tau ‘a e tau lelei ‘o e tui, puke ki he Mo’ui Ta’engata ‘a ia ne ui koe ki ai, pea na’a ke fai ‘a e tukupä lelei ‘i he ‘ao ‘o ha kau fakamo’oni tokolahi.” (1 Timote 6:12)

Kainga ‘oku ‘i ai ‘a e kakai ‘oku nau angamokomoko ‘i honau natula. ‘Oku ‘ikai ke nau fa’a lea pea ‘oku ‘ikai ke nau fa’a tafulu pe ‘ite’ita ka ‘oku mokomoko pe honau anga. Pea ‘oku nau hanga ‘e nautolu ‘o ta’ofi ha vakovi pe ha feke’ike’i ‘o tatau ai pe pe ko e hä ha fa’ahinga me’a. Pea ko kinautolu ia ko e kau fakatupumelino ‘oku ‘iloa ma’u pe kinautolu ‘i ha potu ‘oku ‘i ai ha vakovi pe feke’ike’i ‘oku nau fakatupu pe ‘a e melino.


Pea ko Timote ko e taha ia ha kakai pehé. Ko hono natula pe ko hono ‘ulungaanga ‘oku mokomoko pe. Pea na’e ‘i ai ‘a e manavahee ia ‘a Paula na’a hoko ‘a e tamasi’i ni ko e ‘ave’aveua ‘i he’ene tui, ‘o ‘ikai ke ne tau’i ‘a e ‘uni me’a ko ia ‘oku ne tui ko e me’a ia mei he ‘Otua. Pea hanga leva ‘e Paula ‘o fakalotolahi’i ia ke ne tau ‘a e tau lelei. Tatau ai pe ‘oku ‘ikai ko ha me’a ke faingofua, ka ne tau’i pe ke ikuna. Ko e taimi ko é ‘oku hanga ‘e he kakai ‘o tukuhifo ‘a Timote ‘o hange ‘oku nau hanga ‘o pole’i ‘a ‘ene tui. Na’e fakalotolahi’i ‘e Paula ‘a Timote ke lotolahi pea tu’u malohi mo kaukaua.


Mahalo pe ‘oku ke ‘ilo ha kakai ‘oku nau fo’i faingofua ‘i ha’anau hanga ‘o pukema’u ‘a ‘enau tui ko e lotolahi mo e lototo’a. Tokanga ki ai. Na’a nau kamata ‘enau mo’ui fakakalisitiane ‘i he loto nekeneka mo e loto fiefia. Mahalo pe na’a nau hoko ko e kau taki ia ‘i honau siasi. Pea fai mai ‘a e fononga ‘alu pe ‘a e taimi mo e kamata ke fefeka mai ‘a e ‘aho mo hono taimi. Pea hanga leva ‘e he kakai ‘o fakalotosi’i ‘akinautolu. Pea ko ‘enau ngaahi lotu ‘ikai ke tali ‘i he founga ko é ‘oku nau loto ke tali mai ai. Ko ia ai kuo kamata leva ke lulu’i ‘a ‘enau tu’u mo ‘enau pipiki ki he ‘Eiki. Pea kamata leva ke mole atu ‘a e vekeveke pea mo e fiefia ‘i he kamata. Na’e fakaanga’i kinautolu pea leakovi’i pea manuki’i ko ‘enau muimui ‘ia Kalaisi. ‘Io fai atu fai atu pea nau a’u ki ha taimi kuo nau tölalo pea nau lotosi’i pea nau tafoki kinautolu meia Sisu.


Kia Paula ‘oku ‘ikai ko ha tangata ia ke tu’u tafa’aki pea ne hanga ‘o faka’atä ‘a e ngaahi me’a ko ‘eni ‘oku hoko mai ki hono ki’i kaume’a kei talavou ko ‘eni ko Timote. Pea ‘i he’ene ‘ilo’i ‘a e fa’ahinga natula mokomoko ‘o Timote na’a ne ‘oange leva ki ai ‘a e fa’ahinga talanoa fakalotolahi ko ‘eni ke tokoni ki hono laumalie. Na’a ne hanga ‘o fakaloto’i ia ke pikitai ki hono ui pea mei he ‘Otua, ‘a hono ui mei ‘olunga ke ne hanga ‘o pikitai ki ai ‘i he me’a kotoa pe kotoa pe. He ko hono mahu’inga pe ia.


Kainga ko e taimi ‘oku feinga mai ai ‘a Setane ke ne hanga ‘o ta’ofi koe mei ho’o tauhi ki he ‘Otua. Na’e tu’u ma’u pe ‘a Timote ia ‘o ne malu’i mo ne ta’ofi mo ne teke’i. Ko e taimi ka hoko mai ai hotau ‘atakai ke hoko mai ke ne fakafepaki ia kuo pau ke tu’uma’u pe ‘a Timote ia.


Kainga ‘i he taimi ‘oku hoko mai ai ‘a e kakai ‘o feinga ke nau hanga ‘o veuveuki ‘etau ngaue. Tau tä sipinga mu’a kia Timote he na’a ne tu’uma’u pe ‘o pipiki pe ia ki he ‘Eiki. Na’e ‘ikai ke tala ‘e Paula kia Timote ke ta’eloto pe fakafekiki. ‘Ikai! Ko e me’a na’a ne tala kia Timote ke ne matu’aki malu’i pe ‘a ‘ene tui neongo ‘oku ‘i ai ‘a e taimi ‘e taha ko e tu’uma’u ko ia ‘oku hoko ia ke ne hanga ‘o fakavaivai’i ia pe te ne fakafo’i’i ia. Ka ne kei tu’uma’u pe ‘o malu’i ‘a ‘ene tui.

Ke pehe mu’a ‘a ‘etau fononga ‘oku fai, ‘a e fakatauaange ke tau tokanga ke malu’i ‘a ‘etau tui, malu’i ‘a e ma’oni’oni ‘a e ‘Otua, malu’i, malu’i, ‘oua ‘e tuku ke kaka mai ki he loto’i siasi. ‘Oua ‘e tuku ke hu mai ‘a e fili ‘i ha taha ‘i he kainga lotu ke ne ha’u ‘o feinga’i koe ke ‘osi ho’o malu’i. Ke ke tu’u koe ki hé kae sove ‘a e mo’oni faka-‘Otua, pe te ke feinga koe ke ke hola ‘o kumi mo’ui fakaholafa ki lalo ‘a e ma’oni’oni ia ‘a e ‘Otua.


Ko e mo’ui fakakalisitiane ‘oku ‘ikai ke lotofo’i. ‘Oku lahi ‘a e ngaahi me’a ke tau hanga ‘o malu’i ‘i hotau siasi pe ko hotau fonua kae’uma’ä hotau famili. Pea ko hono ‘uhinga ia ‘oku matu’aki mahu’inga ai ki he tangata takitaha ke tokanga ki he fale’i ‘a Paula.


Kuo pau ke tau teuteu ke tau tu’u fakamakatu’u ‘o fakafepaki’i ‘a e fa’ahinga ivi mo e mafai kotoa pe ‘oku ha’u ke feinga’i ke ne hanga ‘o teke’i kitautolu mei he’etau muimui ‘ia Kalaisi.


TEFITO’I FAKAKAUKAU : Tu’uma’u ‘o malu’i ‘a e ma’oni’oni ‘a e ‘Otua pea ke teke’i ke mama’o ‘i he ivi ‘o e Laumalie ‘a e fa’ahinga fakamaveuveu ‘oku hoko mai ‘i ho va’ihala ke ne veuki ho’o tui ki he ‘Otua.

Be the first to comment on "EPELELI 18 TU’APULELULU"

Leave a comment

Your email address will not be published.


*