EPELELI 19 FALAITE


‘OKU TAU MA’U ‘A E IMISI KO E TUPUFAKALANGI


Folofola ke lau : 1 Kolinito 15:44-49


“’Oku to ko e sino fakakakano, ‘e fokotu’u ko e sino fakalaumalie, kapau ‘oku ai ha sino fakakakano, ta ‘oku ‘i ai mo ha sino fakalaumalie. ‘O hange foki ko e me’a kuo tohi, Na’e hoko ‘a e ‘uluaki tangata, ‘a ‘Atama, ko e kakano mo’ui, na’e hoko ‘a e ‘Atama kimui, ko e laumalie fakamo’ui. Ka tala’ehai ‘oku fuofua hoko ‘a e fakalaumalie; kaekehe, ko e fakakakano, pea toki hoko ‘a e fakalaumalie. Ko e ‘uluaki Tangata ko e tupu fakaemamani, ko ha me’a efu pe: ko hono ua ‘o e Tangata ko e tupu fakalangi. ‘Ilonga pe e anga ‘o e Me’aefu na, pea ma’u ia ‘e he fa’ahinga Me’a-efu: pea ‘ilonga pe ‘a e anga ‘o e Tupu fakalangi na, pea ma’u ia ‘e he fa’ahinga Tupufakalangi. Pea hange kuo tau ma’u ‘a e imisi ‘o e Me’a-efu, pehe foki te tau ma’u a e ‘imisi ‘o e Tupufakalangi” (1 Kolinito 15:44-49).


Kainga ko e ‘aho Falaite lelei ‘oku tau katoanga’i ai ‘a e ‘aho na’e pekia ai hotau ‘Eiki ma’a ‘etau ngaahi angahala ‘i he funga kolosi. ‘Oku fa’a ’i ai nai ha taimi ke ke nofo hifo ai ‘i ha houa ke ke fakalaulauloto ki he fu’u mamahi na’e feia ‘e hotau ‘Eiki koe’uhi pe ko ‘etau ngaahi angahala. Na’a ne pehe ‘i he fo’i poini ‘e taha mei he funga kolosi, “KUO OSI” (Sione 19:30). Ko ‘ene ‘uhinga, kuo tali ‘e he ‘Otua ‘ene fo’i feilaulau tatu’otaha ‘i he funga kolosi, koe’uhi ko e ngaahi mo’ua ‘o ‘etau ngaahi angahala.


Koe’uhi ko e pekia na’e fai ‘e Kalaisi ‘i hotau tu’unga, na’e ‘uhinga ki ai ‘a e fakamolemole’i kitautolu ‘e he ‘Otua, pea kei lava pe ke ne kei tauhi ‘Ene ma’oni’oni mo ‘ene faitotonu. Pea koe’uhi ko ‘Ene pekia, ‘oku ne ako’i kitautolu ki he loloto pea mo e falahi ‘oku tonu ke tau fai ‘i he’etau fakamolemole’i hotau ngaahi kaungafononga. Ko e sipinga ia kuo ta ‘e Sisu ma’a kitaua mei he funga kolosi. ‘Oku ‘ikai ke ta kei anga ‘aki e to’onga ‘o e Me’a-efu, ka ko e ‘ulungaanga ‘o e imisi ‘o e Tupufakalangi.


Neongo ‘ene fakaofo ‘o e ngaahi me’a na’e hoko ‘i he Falaite lelei, ka ko e ki’i konga si’i pe ia ki he me’a ne nanafaki ke hoko mai ‘i he hengihangi koula ‘o e Sapate, ‘i he’ene toetu’u mei he pekia. Na’e ‘i ai ‘a e kau fefine ne na’u ha’u ki he fonualoto, ka na’e pavake mai ‘e he kau angelo ‘a e ongo’ongo pea mo e tukukololia, “Kuo ne toetu’u!” (Luke 24:6). Koe’uhi ko ‘Ene toetu’u, ‘oku ne fakamo’oni mai, ko kitautolu foki, te tau kaungatoetu’u, kapau ko e kau tui kitautolu pea mo talangofua ki he’ene folofola.


TEFITO’I FAKAKAUKAU : ‘I ho’o fiefia ‘i he fo’i mo’oni ko ia na’e ‘uhinga ‘a e ha’u ‘a Sisu ke ne hakeaki’i hake koe, pea ‘oku totonu ke ke fakahaha ‘e tatau ‘o e Eiki toetu’u ki he kakai ‘i ho ‘atakai.

Be the first to comment on "EPELELI 19 FALAITE"

Leave a comment

Your email address will not be published.


*