EPELELI 21 SAPATE


KUO NE TOETU’U MO’ONI


Folofola ke lau : 1 Kolinito 15:55-58


“’E mate, kofa’a ho’o ikuna na? ‘E Mate, kofa’a ho’o huhu na? Ko e huhu ‘a e mate ko e angahala, pea ko e malohinga ‘o e angahala ko e lao. Kae fakafeta’i ki he ‘Otua, he’ene tuku mai ke tau ikuna ‘i hotau ‘Eiki ko Sisu Kalaisi! Ko ia, sio’oku kainga ‘ofa’anga, ke mou tu’u ma’u, ta’engaue, ‘o mou tupulekina ma’u ai pe ‘i he ngaue ‘a e ‘Eiki: ‘i ho’omou ‘ilo ni, ko e me’a ki he ‘Eiki, ko ho’omou fakaongosia ‘oku ‘ikai ko e laufanoo ia” (1 Kolinito 15:5558).


Ko e fa’ahita’u ‘o e Pekia mo e Toetu’u hotau ‘Eiki, ko e fa’ahita’u ‘o e fiefia lahi kiate kinautolu ‘oku nau ‘ilo ‘a Kalaisi. Ka kiate kinautolu ‘oku ‘ikai te nau ma’u “ha ulo atu ‘o e ‘ilo ki he langilangi ‘o e “Otua” (2 Kolinito 4:6), ‘oku ‘ikai ke ‘i ai ha me’a ia ke nau fiefia ai mo ‘amanaki ki ai.


Na’e hanga ‘e Sisu ‘o tuku mai kiate kitautolu ha ‘amanaki pea mo ha pau’ia te ne toe foki mai mo ha Hevani fo’ou pea ne talamai, he’ikai toe ‘i ai ha tangi, pea he’ikai toe ‘i ai ha mamahi, pea he’ikai ha mate kiate kinautolu kuo nau tui pea nau muimui kiate Ia. Ka ‘e ‘i ai ‘a e mamahi, tangi pea mo e lau’aitu kiate kinautolu kuo nau li’aki pea mo e faka’ikai’i Ia.


Ko hotau ui ia ‘i he’etau hoko ko e kau kalisitiane, ke tau talaki ki mamani ‘a Sisu Kalusefai, na’e telio pea ne toetu’u. Ko ‘eku lotu ia kiate koe ‘i he fa’ahita’u ko ‘eni ‘o e Pekia mo e Toetu’u, ‘i he’etau fakalaulauloto ki he fu’u feilaulau na’e fai hotau Fakamo’ui ‘i he funga Kolosi, ke fakafonu ko e ‘aki ‘a e melino mo ha ‘amanaki he “Kuo ne Toetu’u”. Ko e Ongoongolelei ‘o e Kosipeli!

TEFITO’I FAKAKAUKAU : ‘I ho’o muimui kia Kalaisi, talangofua ki he’ene fekau ke ke talaki atu ki ha ngaahi kakai ‘a Sisu Toetu’u, pea kuo ne toetu’u mo’oni.

Be the first to comment on "EPELELI 21 SAPATE"

Leave a comment

Your email address will not be published.


*