EPELELI 25 TU’APULELULU


‘OUA ‘E FAKAFEKIKI


Folofola ke lau : 2 Timote 2:22-26
Veesi Tefito : 2 Timote 2:23-25
“Ka ko e fa’a ‘eke me’a, ‘a ia ko e koto launoa pea ‘ikai ha poto ‘i ai, ke ke fakafisi ki ai, ko ho’o ‘ilo ‘oku tupunga fakakikihi. Ka ko e tamaio’eiki ‘a e ‘Eiki ‘oku ‘ikai täu ke ne fakakikihi, kaekehe ke ne angalelei ki he kakai kotoa pe, ke ne poto ‘i he faiako, ke ne makataki ‘a e kovi: ke ne fai angamalü ‘ene tautea ‘a kinautolu ‘oku fakatau’ilea, hei’ilo ‘e faifai pea ‘ange ‘e he ‘Eiki ‘a e fakatomala ke nau tafoki ki he ‘ilo’i totonu ‘o e mo’oni.” (2 Timote 2:23-25)


Kainga ‘oku toko lahi ‘a e kakai ‘oku nau sai’ia pe kinautolu ‘i he me’a ko e fakafekiki. Te nau fakafekiki pe ‘i ha fa’ahinga me’a ‘o a’u ai pe pe ‘oku tau tui ki he poini ko ia, ko ‘ene ‘ikai pe ke nau tui ki ai kuo nau fakafekiki’i. Pea ko e kakai ia ko ‘eni hange ha’a nau ongo’i ia ‘enautolu ko honau fatongia ia ke fai ki he kakai kehe ki he poini kotoa pe kotoa pe ko e fakafekiki. Pea kuo ma’u ai pe kinautolu ia ‘e he fa’ahinga laumalie tipeiti mo e fakafekiki, ke ‘i ai pe ha me’a te nau lea ‘aki kehe pe ke ikuna ‘a ‘enau fa’ahi pe ko ‘ene fakafekiki ‘oku fai. Pea ko hono ‘ai ‘e taha ‘oku nau hanga ‘enautolu ‘o heu ‘a e ‘ita, pea nau hanga leva ‘o fakamamahi ‘a e loto ‘o e kakai. Hanga ‘o fakatokanga’i ange ‘a e fakatu’utamaki ‘o e fa’ahinga kakai pehe ‘oku nau manako pe ki he fakafekiki.


Na’e hanga ‘e Paula ‘o fakatokanga kia Timote ke ‘oua ‘aupito ‘e tohoaki ia ki he fa’ahinga ‘ulungaanga ko ia ko e fakafekiki. Ko e kalisitiane ‘e lava pe ke hu’i ‘enau fakakaukau ‘o pehe ‘oku fiema’u ‘e Kalaisi kitautolu ke tau fakafekiki’i ha poini mo ha taha ‘oku ne hanga ‘o fakafehu’i ‘a e Kosipeli. Pea tau fakakaukau ko ha tau fatongia ia ke ‘ai ‘a e kakai kehe ke nau sio ki he mo’oni ‘o e Kosipeli.


Kainga ‘i he’etau loto vekeveke ke tau hanga ‘o ikuna’i ‘a e kakai ki he Pule’anga ‘o Hevani pea mo Sisu Kalaisi, kuo pau pe ki hotau ‘ulungaanga ke tau anga fakakalisitiane ‘i tu’a mo loto. Kuo pau pe ke tau tauhi ‘a e kakai kehe ‘aki ‘a e loto’ofa mo e angamalü mo e angavaivai, ‘o ‘ikai ‘aki ‘a e angatu’u mo e anga fakafekiki.


Ko e me’a ia ko e mo’oni ‘e hanga pe ‘e he mo’oni ia ‘o tokanga’i pe ‘e ia ia. ‘Oku ‘ikai ke fiema’u ia ke tau hanga ‘o fakahä mai ia ‘aki ‘etau fakafekiki mo ‘etau tau lau. Ko e taimi ‘oku tau ‘ita ai pea tau ‘oho ‘o malu’i ko e ‘uhinga ko e ‘ikai ke tau falala ki he ‘Otua ke ne fai ‘e ia ‘a e fakaa’ua’u ‘o e mo’oni. Pea ‘oku tau fakae’ee’a leva ‘oku ‘ikai ke tau falala ki he me’a ko é ‘oku tau lea ‘aki.


Ko e me’a ‘oku tau lea ‘aki ko e mo’oni ia, pea ‘afio ‘a e ‘Otua ki ai ‘oku hanga ‘e he fononga ‘o taimi ‘o fakamo’oni’i ko e folofola ko ia pe ‘e taha ‘oku mo’oni. Kapau leva ‘e ma’u kitautolu ‘i he me’a ‘oku ui ko e fakafekiki, ko hono ‘uhinga he ‘oku tau fu’u tokanga ange kitautolu ki he’etau fakafotunga ha ki he mamani kae ‘ikai ko ‘etau hanga ‘o ‘omai ‘a e mo’oni. Ko ‘ete feinga ke te ikuna’i ‘a e fakafekiki ‘e hoko leva ‘a e me’a ia ko ia ko ho’o fo’i ‘afungi pe ia ‘a’au.


Kapau leva te ke ‘ilo’i koe ‘oku hokohoko ma’u pe ho’o fakafekiki ‘oku ‘i ai ‘a e fehalaaki ia mo koe. Mahalo ‘oku ‘i ai ha’o palopalema ‘afungi. He ko ho’o fakafekiki ko ho’o ma’u ‘a e palopalema ko e ‘afungi. Mahalo pe ‘oku ‘ikai te ke ‘ilo ia ‘e koe ‘a e anga ho’o fononga mo e kakai kehe. Mahalo pe ko ho loto ‘ou ‘oku fonu ia ‘i he ‘ita, pea ‘oku ke feinga ha me’a ke ke ‘atä ai pea mei ai. Pea mahalo pe ‘oku ‘ikai te ke falala ki he mo’oni ‘oku ke hanga ‘o fakae’a. Pe ko e ha ‘oku ne fakatupu koe ke ke fuhu pea ke kē, ‘ave ia kia Kalaisi. Kole ki ai ke ne fakafonu koe ‘aki ‘a e ‘ofa mo e matu’aki mateaki’i ‘a e mo’oni, kae ‘ikai ko ho’o feinga ke ke totonu ma’u pe ma’u pe.


TEFITO’I FAKAKAUKAU : Vave ma’u pe ke ke hanga ki he ‘Otua ke ne to’o ‘a e ‘afungi mei ho’o mo’ui. Ka ke li ma’u pe koe ki lalo pea tuku ai pe ‘a e ikuna ia ke fai pe ‘i he mo’oni ‘a e ‘Otua

Be the first to comment on "EPELELI 25 TU’APULELULU"

Leave a comment

Your email address will not be published.


*