EPELELI 26 FALAITE


KO E FAKATANGA


Folofola ke lau: 2 Timote 3:1-13
Tefito’i Veesi : 2 Timote 3:12
“’Io, pea ko kinautolu kotoa pe ‘oku loto ke mo’ui lotu mo’oni ‘ia Kalaisi Sisu ‘e fakatanga kinautolu foki.” (2 Timote 3:12)


Kainga na’e ‘ikai ke ma’u ‘e Timote ‘a e ‘ulungaanga lelei taha mo e fa’ahinga me’a’ofa lelei taha ki he fa’ahinga mo’ui ‘i he ta’u pe ko e kuonga ‘o e fakatanga ‘o hange ko ia na’e ‘i ai. Ko hono fa’ahinga angamalü mo e anga fo’i mo vaivai pea ‘ikai ngata ai ko hono fa’ahinga natula ta’e fakafepaki, ‘oku matu’aki faingofua ia ‘i he kuonga mo e ‘aho ko ia ‘a é na’e li ai ‘a e toko lahi ‘o e kakai ki he ‘ana ‘o e fanga laione ko e ‘uhinga ko ‘enau tu’u’ ia Kalaisi.


Na’e feinga lahi ‘a Paula ke ne hanga ‘o teuteu’i ia ki he ngaahi faingata’a te ne fehangahangai mo ia. Pea ne hanga leva ‘o fakatokanga kia Timote ko e taha kotoa pe ‘oku kamata ke ne tui ki he lotu fakakalisitiane, pe ko e taha kotoa pe kuo kamata ke ne fai ‘a e lotu mo’oni kuo pau ke fakatanga’i. Pea ko e founga ke ta’ofi ai pe te te hao ai mei he fakatanga ko ‘ete hanga ‘o fakafisinga’i ‘a Sisu Kalaisi.


‘Oku toko lahi ‘a e kau kalisitiane ‘oku nau hanga ‘o tali ‘a e ngaahi faingata’a ko e faka’ilonga ‘oku ‘ikai ke nau fai ‘a e finangalo ‘o e ‘Otua. ‘Oku pehe ni ‘a ‘enau ‘uhinga, ‘oku fiema’u ‘e he ‘Otua ia keu fiefia. Ka ‘i he me’a ko ‘eni ‘oku hoko mai kiate au, ‘oku ‘ikai te u fiefia ai au. Mahalo pe ‘oku fiema’u ‘e he ‘Eiki au ke u li’aki Ia. Pea nau fakamoleki leva ‘a e toenga ‘o ‘enau mo’ui ke ta’ofi ha me’a te ne fakatupu ai kinautolu ke nau ta’efiemalie. Pea a’u ai pe ki ha fiema’u ‘e he ‘Otua kinautolu ke nau kataki lahi ‘a e ngaahi ta’efiemalie mo e ngaahi tokatamaki ko e ‘uhinga ko hono Huafa.

Kapau ko e ‘Otua ‘oku ne tokanga mai pe ke tau fiefia peseti ‘e teau ‘i he taimi kotoa pe; he ‘ikai ke ‘alu tokua ‘a Sisu ia ki he kolosi. He ‘ikai ke faifaiange kuo tu’usi ‘a e ‘ulu ia ‘o Sione Papitaiso. He ‘ikai ke ‘alu ‘a Paula ‘o tuku pilisone’i. Ka ‘oku fu’u tokanga fau ‘a e ‘Otua kiate kitautolu he ‘etau talangofua ‘i he’etau ongo’i fiemalie.


‘Oku ‘uhinga ‘eni kia koe ko e ha? Mahalo pe he ‘ikai ke li koe ki he ‘ana ‘o e fanga laione ko e ‘uhinga ko ho’o tui pe tu’usi ho ‘ulu. Ka ‘oku mahalo pe te ke fepaki mo e ngaahi faingata’a lahi. Kuo pau pe ‘e manuki’i koe ko ho’o tui ‘i ‘apiako ‘i he ngaue. Mahalo pe ‘e tukuange koe ‘oua te ke kau ‘i ha ngaahi fakafiefia pe ha ngaahi inu kava mo e ngaahi konaa. Mahalo pe he ‘ikai ke toe manakoa koe ko e ‘uhinga ko e potu ko ‘ena ‘oku ke ‘i ai. Te ne hanga ‘o ‘omai ha ngaahi fakaanga mei ho’o matu’a pe ko ho fanga ki’i tehina. He ‘oku hoko mai ‘a e fakatanga kiate koe ‘i he ngaahi founga kehekehe. Ka ko e hange ko é ko e lau ‘a Paula. Kapau te ke kumi ke ke mo’ui ‘i he lotu mo’oni, hanga ‘o fakapapau’i ko e fakatanga ‘e hoko mai.


Ka neongo ia ko ia, ko e taimi te ke ikuna’i ai ia te ke kaunga vahevahe mo ia ho pale fakalangilangi ‘o hange ko ia ko Sione Papitaiso, Sisu, mo Paula. Kuo ‘osi fakapapau mai ‘a e folofola kiate kitautolu, he ‘ikai ke ‘i ai ha faingata’a ‘i he mo’ui ko ‘eni ‘e kākākunga ia mo e fakaofo ‘a e ‘ofa ‘e hoko mai kia koe mei he ‘Otua pea mei ‘Itaniti.


TEFITO’I FAKAKAUKAU : Matu’uaki ‘a e fakatanga koe’uhí ko ho’o lotu mo’oni, koe’uhí ko ho’o mavahe ‘o tui kia Sisu Kalaisi ke ke ‘ilo’ilopau ‘oku ‘ikai ko koe ‘oku fakatanga’i ka ko e Sisu ‘iate koe. Pea kuo pau te ke fou ‘i he hala tatau, pea ko ho pale mo ho kalauni ‘oku lahi faufau.

Be the first to comment on "EPELELI 26 FALAITE"

Leave a comment

Your email address will not be published.


*