EPELELI 28 SAPATE


MOU FAKA’EHI’EHI


Folofola ke lau : 2 Timote 4:1-8
Veesi Tefito : 2 Timote 4:5
“Ka ko koe, ke ke faka’ehi’ehi mei he konä ‘i he me’a kotoa pe; kataki e ngaohikovia, fai ‘a e ngaue faka’evangelio, fai hono kotoa ‘o ho lakanga.” (2 Timote 4:5)


Kainga ‘oku tau lau ‘a e faka’ilonga he taimi ni. ‘Oku pehe mai, mou tokanga ko e mamani ko ‘eni ‘oku nau fiema’u ‘e kinautolu ia ke fakatokanga ki he’enau mo’ui. Ko e ha hono ‘uhinga ‘oku mahu’inga ai ki he kau kalisitiane ke nau hiki honau ‘ulu pea ke nau faka’ehi’ehi ‘o hange ko e fakamatala ‘a e liliu tohi ‘e ni’ihi? Pea ‘oku ‘uhinga ia ‘e kainga ke ‘oua na’a tau misi pe li’aki ha fo’i faingamalie ‘e taha ‘oku ‘omi ‘e he ‘Otua kiate kitautolu ke tau ngaue ai ma’ana.


Ko e taimi ni ‘oku lolotonga ngaue ‘a e ‘Otua ‘i hotau ‘atakai. Pea ‘oku ‘ikai ke ‘i ai ha fakafehu’i ia ki ai. Ka ko e fehu’i? Me’a ni nai ‘oku tau tokanga fe’unga ke tau sio ki he me’a ‘oku lolotonga fai ‘e he ‘Otua pea tau kaunga ngaue leva mo Ia? Kapau leva te tau hanga ‘o fakakaukau’i ‘o matu’aki fakafiemalie’i pe ‘etau ngaahi fakakaukau ‘aki ‘a e ngaahi faito’o kona tapú pe ko e konaa, pe te tau hanga ‘o fakanenefu hotau ‘atamai ‘aki ‘a e ngaahi houa ‘i he televisone mo e ngaahi ngaue ta’e ‘uhinga ‘ikai hano kaunga ‘e taha ki he finangalo ‘o e ‘Otua. ‘E ngalingali nai te tau pehe pe ‘oku tonu pe ‘etau fai ia ‘i he uhouhonga ‘o e ngaahi ngaue faka-‘Otua. Ka ‘e lava pe ke matu’aki misi kotoa pe ‘a e ngaahi ngaue ‘oku tau fai.


Mahalo pe ko ha toko taha ‘oku matu’aki fu’u ofi mai kiate kitautolu ‘oku ne fu’u fiema’u ke fetaulaki ia mo Kalaisi. Ka ke tau hanga ‘etautolu ‘o faka’efihia ia ‘i he ngaahi ngaue noa’ia ‘oku tau hanga ‘o fai. Mahalo pe ‘oku ‘i ai ha kaume’a ‘oku si’i loto mamahi pe loto lavea, ka koe’uhí ko ‘etau ta’e leohi pea ‘ikai leva ke ‘i ai ha’atau me’a ‘e taha ke tau fai ke tokoni kiate ia. Meimei ko ‘etau hoko mai ki he taimi faingata’a ‘i he’etau ngaahi mo’ui, pea tau ‘ilo ai kitautolu ‘oku tau ta’e teuteu ke tau hanga ‘o handle pe ke tau tokoni ‘i he fo’i me’a ko ia.


‘I he taimi na’e hanga ai ‘e Paula ‘o fakalotolahi’i ‘a ki’i Timote ke ne fai ‘a e ngaue ‘evangelio na’e ‘ikai ke ne ‘uhinga ia ke ne kamata ha’ane ngaue minisituli fakatelevisone pe folau takai holo ‘o malanga takai holo ‘i mamani. Na’e hanga ‘e Paula ‘o fakalotolahi’i ‘a Timote ke ne teuteu ki he ngaahi faingamalie ‘e hanga ‘e he ‘Otua ‘o ‘omai fakahangatonu ia ‘i hono hala ke ne vahevahe mo ia ‘a e Ongoongolelei ‘o Kalaisi.


Ko e tatu’olahi ‘a e ‘ikai ke tau hanga ‘o fakaha ki he kakai kehe ke nau ‘ilo ‘a Kalaisi ‘i ha founga fakafo’ituitui. Ko hono ‘uhinga he ‘oku tau matu’aki fu’u fakatuku fakaholo pe kitautolu mo fakakuonga mu’a ‘i he ngaahi me’a ‘oku fai ‘e he ‘Otua ‘oku ne lolotonga fai ‘iate kitautolu. Pea ‘oku ‘ikai ke tau hanga ‘o fakatokanga’i ‘a e faingamalie ko ia ke tau huka ki ai.


Mahalo pe ‘oku ‘i ai ha kaume’a ‘oku matu’aki fu’u lotomamahi ‘aupito hono humaki pe loto lavea hono humaki he Laumalie Ma’oni’oni. Ka ‘oku tau fu’u femo’uekina pe kitautolu ia ke fai ha tokoni ki ai. Ko e ‘uhinga ‘e taha ‘oku tau tonounou ai ke vahevahe ‘a e mo’oni ‘a e ‘Otua, ko hono ‘uhinga he ‘oku te’eki ai ke tau ‘ilo ‘e tautolu ia, ‘a kitautolu. ‘Oku ‘ikai ke tau kei fai ai pe, kuo li’aki ‘a e lotu, pe kuo tau fakamoleki e taimi lahi e lau a e folofola, pea tau nofo ‘o ta’e teuteu ai ki he me’a ‘e ‘omi ‘e he ‘Eiki ‘i he ‘aho taki taha.


‘Oku lahi ‘aupito ‘a e ngaahi founga ‘a e ‘Otua ‘oku ne fiema’u ke ne hanga ‘o fakakau koe ki ai ‘i he taimi ko ia ‘oku ne ngaue ai. Pea ‘oku ne ‘afio’i pe ‘a e me’a te ke fehangahangai mo ia ‘i he ‘aho ni. Pea ‘oku ne fiema’u leva ke ne teuteu koe. ‘Oku ke mateuteu? kuo ke ofo hake? Teuteu leva.


TEFITO’I FAKAKAUKAU : Ofo hake pea ke teuteu leva he ‘oku ‘ikai te ke ‘ilo ‘a e me’a te ke fehangahangai mo ia ‘i he ‘aho ni, ‘a e me’a ‘e ‘oatu ‘e he ‘Otua ke ke fai. Ofo hake pea ke teuteu.

Be the first to comment on "EPELELI 28 SAPATE"

Leave a comment

Your email address will not be published.


*