EPELELI 30 TUSITE


KI HE KAU MALUALOI


Folofola ke lau : Taitusi 1:16; 2:1-8
Veesi Tefito : Taitusi 1:16
“’Oku nau lau ‘oku nau ‘ilo ‘a e ‘Otua, ka ‘i he’enau ngaahi ngaue ‘oku nau faka’ikai’i ia, ‘e he’enau fakalielia mo talangata’a, mo e ‘ikai ha’anau momo’i sia’a ‘i ha ngaue ‘oku lelei.” (Taitusi 1:16)


Kainga ‘oku ngalingali ko e ‘uhinga ‘e taha ‘oku fa’a poaki ‘e he kakai he ‘ikai ke nau ‘alu ‘o ma’u lotu, ko ‘enau sio ki he fonu ‘a e siasi ‘i he kau malualoi. Ko e kakai nai ‘e toko fiha kuo nau situ’a mei he lotu fakakalisitiane ‘i he ngaahi ‘uhinga kehekehe ‘oku kau ‘o fekau’aki mo e fa’ahinga to’onga mo’ui ‘a e kakai ‘i he Siasi?


Ko e taimi ‘e ni’ihi ‘oku fakafiemalie’i kitautolu ‘aki ‘etau fa’a pehe ‘oku ‘ikai ke haohaoa ‘a e kalisitiane kotoa pe, ka ke fakamolemole’i, pe ko e mo’oni e mo’oni ‘oku tokolahi ‘a e kau malualoi ‘i he Siasi, kae fakafeta’i pe ‘oku nau ma’u lotu. Pea hanga leva ‘e he kau faka’uhi’uhinga ‘o mei ‘ai kitautolu ke tau ki’i ongo’i lelei,ka ‘oku tila fefeka ange ‘a e ‘Otua mo e kau malualoi ‘i he’ene fakamaau’i ‘a e kau kalisitiane ko ia ‘i he kau ta’e kalisitiane.


‘Oku fehi’a ‘aupito ‘a e ‘Otua ‘i he malualoi! ‘Oku ne sio fakalaka ‘i he’etau ngaahi lea, fakalaka atu ‘i he’etau ngaahi ngaue ‘o ‘alu atu ‘o a’u ki hotau ngaahi loto. Ko e me’a ‘oku ne fiema’u ke ne sio ki ai ‘oku ne sio ki he fo’i laumalie ‘e fe’unga mo e fo’i lea kotoa pe mo e fo’i ngaue kotoa pe ‘oku tau fai. Ka ko e palopalema mo e kau malualoi he ‘oku ‘ikai ke nau ‘ofa kinautolu ia ‘o fai ke mo’oni ‘ia Sisu.


Mahalo pe te ke sio ki ha toko taha ‘oku ne tala ko e kalisitiane ia, ka ko ‘ene mo’ui ‘oku ne hanga ‘e ia ‘o li ki lalo ‘a e Huafa ‘o Sisu. Pea ‘e te ke fakafehu’i kiate koe, ‘e fefe ha mo’ui pehe ‘a ha kalisitiane? Pea ‘oku faingofua ‘aupito ‘a e tali ia ki ai; he ‘ikai ke ne lava. He ko Sisu ‘oku ‘ikai te ne makataki’i ‘a kinautolu ‘oku nau hanga ‘o lau ko e kau muimui ‘akinautolu ‘o Kalaisi, kae ‘osi ko ia ‘oku ‘ikai ke nau ‘ofa kinautolu ‘iate Ia. Pea ne hanga leva ‘o talaki ‘a e ‘aho fakamaau ‘e hoko mai kiate kinautolu.


‘Oku ‘i ai ‘a e toko lahi ‘oku nau pehe ‘oku nau fai ‘a e ngaahi me’a lalahi ‘i hono Huafa ka ko ‘ene tali kiate kinautolu ‘o pehe; ‘alu ‘a kimoutolu he ‘oku ‘ikai te u ‘iloa ‘a koe ‘a e kau faikovi (Matiu 7:23).


Na’e ‘ikai ‘aupito ke makataki’i ‘e Paula ha malualoi ‘e hoko mai. Na’a ne ui kinautolu ko e kau talangata’a pea ta’e fe’unga ke fai ha me’a lelei. Ko ia ai, ko e ha ha me’a te ke fai ‘o fekau’aki mo e kakai ‘oku nau malualoi ‘i he ngaahi feitu’u ‘oku tau ‘i ai? Tau tui pe tokua, he ‘ikai ko e me’a lahi, ka ‘e hanga ‘e he ‘Otua ‘o alasi kinautolu.


Ko e ha leva ‘a e me’a te ke fai ke ke sivi ‘aki ho loto? Kapau leva ‘oku ke nofo ‘i ha mo’ui ko e mo’ui ‘oku malualoi ‘o ke lea ‘aki ‘a e ngaahi lea tonu, ‘o ke fai mo e ngaahi ngaue totonu mo e ngaahi me’a totonu, ka ‘oku ‘ikai ke kau ai ‘a e ‘ofa ‘i ho loto ki he ‘Otua; ‘oua na’a ke waste ha toe miniti ‘o maumau’i ha toe miniti ‘i ho’o hanga ‘o fakamamahi’i ‘a e ‘Otua. Fā’ofua kiate Ia! Fakatomala ho’o angahala pea ke lotu ke ne hanga ‘o tohoaki koe ke ke toe ofi ange kiate Ia ‘i he taimi ni.


TEFITO’I FAKAKAUKAU : ‘Oua ‘e fai ‘i he malualoi, ka ke fai ‘a e me’a kotoa pe, kotoa pe, ko hono laumalie ko e ‘ofa ki he ‘Otua.

Be the first to comment on "EPELELI 30 TUSITE"

Leave a comment

Your email address will not be published.


*