ME 2 TU’APULELULU

AKO KE KE FANONGO PEA MEI HE ‘OTUÁ

Folofola ke lau : 1 Samiuela 3:1-10 Veesi Tefito: 1 Samiuela 3:7-8 “Ka ‘oku te’eki ‘ilo ‘a e ‘Eiki ‘e Samiuela, pea kuo te’eki fakahā kiate ia ‘a e folofola ‘a Sihova. Pea toe fai ‘e Sihova ‘a e ui, Samiuela! Ko hono tu’o tolu ia. Pea ne tu’u ‘o ‘alu kia ‘Ilai, ‘o ne pehē, Ko au ‘eni; he na’a ke ui au. Pea e’a kia ‘Ilai, ta ko Sihova kuo ne ui ‘a e tama”

Na’e tupu hake ‘a Samiuela ‘o hoko ko e taha ia ha taki fakalaumalie lalahi taha ‘o ‘Isileli ne te’eki ke nau a’usia. Ko e tokotaha ta’emanavahe mo ta’eufi ‘a ‘ene lea mo ‘ene taukave pea ma’ae ‘Otuá. Ko e taimi ko é na’e fiema’u ha tataki pea ma’ae kakai, na’e ‘omi ‘e Samiuela ha folofola pea mei he ‘Otuá. Ko e taimi ka fie fanongo ai ‘a e tu’í mei he ‘Otuá, ko Samiuela ‘a e tokotaha ko iá. Na’e fu’u mātu’aki luelue vāofi ‘a e fononga ‘a Samiuela pea mo e ‘Otua, ‘o ‘ikai faifaiange ha taimi kuo ne ofo ‘i ha me’a na’e fiema’u ai ia ‘e he ‘Otua ke ne fai.

Na’e ‘oange ‘e he ‘Otua ki ai ha tataki mātu’aki mahino ‘i he fo’i sitepu kotoa pe ‘o hono va’ihala. Ko e me’a tatau pea mo kitautolu kainga, ‘oku ‘ikai ha toe me’a te ne toe fakamahino ‘a e Le’o ‘o e ‘Otuá, ka ko ‘ete ‘a’eva faka’aho, mātu’aki vāofi pea mo Ia ‘i he houa takitaha.

Mahalo pe ‘oku ke ‘ilo ha tangata pe fefine ‘oku hange ko Samiuela, ‘oku hangehange ‘oku ‘i ai hano ki’i va’ihala fakaloto pe, pea mo e ‘Otua. Pea ke faka’amu ke ke ‘ilo ‘a e ‘Otua ‘o hange ko iá. Ko e mo’ui fakakalisitiane, ‘oku tatau ai pe ki he taha kotoa ke ne kamata ‘i ha kamata tatau pea mo Samiuela.

Fakakaukau ange ki ha kau kalisitiane ‘oku nau fu’u anga faka’Otua, pea ‘oku tatatalame’a ki ai ‘a e ‘Otuá. Ko ‘enau kamata ‘oku tatau mo e taha kotoa pe, ko e kau sola kinautolu ki he ‘Otua. Ko e kalisitiane kotoa pe, ko ‘ene kamata ko e muli mo e sola ki he ‘Otua, pea na’e tatau pe mo Samiuela.

Ko e taimi na’e fuofua ui ai ‘a e ‘Otuá kia Samiuelá, na’e ‘ikai ke ‘ilo ‘e Samiuela, pe ko hai ‘oku ne ui ia. Na’a ne pehē tokua, ko e taula’eikí, ‘a ‘Ilai, pea na’e pau leva kia Samiuela ke ne ako ke ne hanga ‘o ‘ilo ‘a e Le’o ‘o e ‘Otua, pea ne mahino’i, ko e ‘Otuá ‘oku lea ange kiate ia, pea tatau pe mo koe.

‘I he ‘osi ‘o e ngaahi ta’u ‘o e fakamoleki ‘e Samiuela ha taimi lahi pea mo e ‘Otuá, na’e hoko mai leva ‘a Samiuela ke ne mahino’i, ko e le’o ‘eni ‘o e ‘Otuá. Ko ia, ‘oua na’a ke lotosi’i he taimi lahi, ‘oku te’eki te ke maheni ai pea mo e Le’o ‘o e ‘Otuá, ka ke hoko atu pe ‘a ho’o luelue mo ho’o feohi pea mo e ‘Otuá, pea te ke a’u pe ‘o ke maheni pea mo Ia.

‘Oku ‘ikai ke toe ‘i ai ha toe founga ia ke tau ako ai, ke tau ‘ilo ‘a e Le’o ‘o e ‘Otuá, ka ko ‘etau fakamoleki pe ha taimi lahi he pōtalanoa pea mo Iá. Ko e me’a malie fau, ko ho’o ma’u ha faingamalie tatau pea mo Samiuela, ke ke hoko ai ko ha fu’u saieniti fakalaumalie, ‘o hange ko Samiuela. ‘E folofola ‘a e ‘Otua kiate koe ‘o hange pe ko ‘ene lea kia Samiuela pea mo e kakai kehé. Kia Samiuela, na’a ne tulituli ‘a e faingamalie kotoa pe na’a ne ma’u ke ne ‘ilo ‘a e ‘Otua, pea ko e olá, na’e fai ‘e he ‘Otuá é me’a lahi ‘i he mo’ui ‘a Samiuela.

Mahalo pe he’ikai te ke fakatokanga’i ‘a e Le’o ‘o e ‘Otua ‘i he taimi ni, kae hokoatu pe mu’a ho’o nofo ‘i he ‘ao ‘o e ‘Otua, he ‘e ‘i ai é ‘aho ‘e hoko mai, he’ikai te ke toe veiveiua pe ko e ‘Otuá ia pe ‘ikai, ka te ke ‘ilopau, ko e ‘Otua pe ia ‘oku leá.

TEFITO’I FAKAKAUKAU: Hoko atu ‘a ho’o luelue pea mo ho’o talanoa pea mo e ‘Otuá ke ke maheni pea mo Ia, pea ‘oua te ke lau ‘a e fuoloa, kae ‘oua kuo ke maheni pea ke ‘ilo lelei ‘a Hono le’o.

Be the first to comment on "ME 2 TU’APULELULU"

Leave a comment

Your email address will not be published.


*