ME 6 MONITE

MANAVAHĒ

Folofola ke lau: Paloveape 1:1-9 Veesi Tefito: Paloveape 1:7 –“Ko e ‘apasia kia Sihova ko e ‘uluaki me’a ia ‘i he ‘ilo: Ko e poto mo e ako, ko e vale pe ‘oku ta’etoka’i ia”

‘Oku tau ma’u pe ‘i he folofolá ‘a e fo’i setesi ko ‘eni; ‘Oua ‘e manavahē. Ka ‘i he a’u ia ko ‘eni ki he veesi ko ‘eni, ‘oku pehē ‘e Kingi Solomone ia, ko e manavahē, ko e me’a lelei. He ko e manavahē, ko e me’a ia ‘oku kamata mei ai ‘a e ‘ilo. ‘E fakafēfē ia?

Talu mei he’etau ‘ilo, ko e mo’oni kotoa pe, ko e ha’u ‘ata’atā mei he ‘Otua. Ko e founga pe taha ke tau mahino’i ai ‘a e mo’oni lahi taha ‘o e mo’ui, ka ki he ‘Otua, ke ne fakahaa’i Ia kiate koe pea mo au. He ‘oku fili ‘e he ‘Otua ke ne foaki ‘a e potó, kiate kinautolu pe ‘oku manavahē. Pe ko e kakai ‘oku nau faka’apa’apa, kakai ‘oku ‘apasia kiate Ia.

Ko e ‘apasia ki he ‘Otuá, ‘oku ha’u ia mei ho’o hanga ‘o ‘ilo’i ‘a e tokotaha ko ia ‘oku ke fakatauhoa ki ai ‘a e mo’ui. Pe ko ho’o ‘ilo’i ‘a e tokotaha ko ia mo ‘ene to’onga mo ‘ene fo’i mo’ui fakalukufuá.

Hanga angē ‘o tukuange ha ki’i miniti si’i ke ke fakakaukau ki he tatau ‘o e ‘Otuá. ‘Oku ne malohi noa. Ko Ia na’a ne hanga ‘o fa’u ‘a e ‘univeesi ko ‘eni mei he hala’atā. ‘Oku ne ‘ilo kanokato. ‘Oku ne hanga ‘o ‘afio’i ho’o fo’i ngaue kotoa pe, ho fo’i anga kotoa pe, ho fo’i ‘amanaki mo e mohe misi kotoa pe. ‘O a’u ki ho ngaahi fakakaukau kotoa pe, pea ne ‘ilo ki ai. ‘Oku ‘ikai ke fakangatangata hano taimi. ‘Oku tatau ai pe ia ‘i he ‘aneafi, ‘aho ni mo e kaha’u, pea ‘oku ke ‘i he lotolotonga hono finangalo ma’u pe.

Ko Ia na’a ne hanga ‘o fokotu’u ‘a e taimi. Pea ‘oku fu’u fakaofo ke tau mafakakaukaua ‘a e fa’ahinga ‘ulungaanga ‘a e ‘Otua. ‘Ikai ko ia? Hono ‘ikai faka’uli’ulia pea fakamanavahē ke tau ‘ilo, ko e ‘Otuá ‘oku ne ‘ofa’i kitautolu ‘o lakaange ia ‘i he’etau mahino’i ‘e kitautolu ‘atautolu. ‘Oku kakato ‘a ‘ene ‘ofa’i kitautolu, he na’a ne tukuange ‘a Hono ‘Alo tofu pe ‘e taha, ‘a Sisu Kalaisi, ‘o fakamo’ulaloa’i ia pea ngaohikovia, pea kalusefai ke totongi ‘aki ‘etau ngaahi angahala.

Hangehangē ‘oku ‘ikai ke tau malava ‘o mafakakaukaua, ko e ‘Otuá ‘oku ne manako pea ne tatali mai ki ha’atau mātu’aki feohi vāofi pea mo Ia, ‘o ‘ikai ngata pe ‘iate koe mo au, ka ki he tangata takitaha ‘i he mamani ko ‘ení. Ka ‘i he taimi tatau pe, ko e kakai ia na’a nau hanga ‘o tukifa’o ia ki he kolosi. Pea ko e ‘ilo ki he fa’ahinga me’a pehē, ‘oku ne ngaohi kitautolu ke tau tetetete mo manavahē. Manavahē na’a hange ‘e he ‘Otua ‘o fakalavea’i kitautolu, ka ‘i he’etau ‘apasiá, mo ‘etau nofo manavahē ‘i he manavahē ko ia ‘o e ‘ilo ‘o I, ‘a ‘ene fu’u tōatu mo ‘ene fu’u lahi faufau, ko e me’a ia ‘oku kamata mei ai ‘a e ‘ilo.

Ko ia ‘e kainga, ‘i he’ene kamata ke tau mahino’i ‘a e ‘Otuá ‘a e me’a kuo ne fai ma’atautolú, pea mo hono tatau, ko ‘etau kamata ia ‘i he va’ihala ko ia, ke tau luelue ‘i he potó, pea ko e lea lelei taha pe ia kuo fai ‘e Solomone, ko e vale pe te ne fakafisinga’i ‘a e faingamalie ko ia, he ko e POTO ko e ‘ilo ‘a e ‘Otuá.

TEFITO’I FAKAKAUKAU: Feinga ke ke mahino’i ‘a e lahi mo e mafimafi ‘o e ‘Otuá, ke ne ‘oatu ‘a e ‘apasiá kiate koe. He ‘oku hoko mai ‘a e ‘apasia pe ko e manavahé ‘Otuá, mei ho’o mahino’i ‘a e ‘Otuá. Kuku ke ma’u ‘a e fo’i ‘ilo ko iá ‘i ho’o ‘apasia mo ho’o manavahe, ko e kamata ia ke ke luelue ‘i he ‘iló he ko e potó, ko e ‘ilo ‘a e ‘Otuá

Be the first to comment on "ME 6 MONITE"

Leave a comment

Your email address will not be published.


*