ME 7 TUSITE

FAKALOTO’I

Folofola ke lau : Paloveape 1:10-23 Veesi Tefito: Paloveape 1:10 “Tama, kapau ‘e fakaloto’i koe ‘e ha kau angahala, ‘Oua te ke loto ki ai”

Ko e taimi ‘oku ke lau ai ‘a e Paloveape ko ‘eni, ‘oua na’a ke fakakaukau ‘o pehē; he’ikai ke hanga ‘e he kau angahalá ‘o fakaloto’i au. Pea he’ikai keu feohi pea mo e kau angahala.

‘I he tohitapu, ko e angahalá, ‘oku ‘uhinga ia ki ha tokotaha ‘oku ‘ikai ke ne talangofua ki he ‘Otuá. Pea ‘oku ‘uhinga ia, ko e fakaloto’i he ‘ikai ha’u ia mei he faito’o konatapu, pe ha’u mei he kau lalekini he hala, kau fe’auaki, pe hoko mai mei he’ete fakaafe ki ho kaume’a fafalé. Ko e ngaahi fakaafe ko ‘eni, mahalo pe ‘e fakafiefia, ka ‘e hoko ia ko e ngaahi ‘ahi’ahi. Ka ke tokanga, ‘e taki ‘a e ‘ahi’ahi ki ha fakatu’utāmaki lahi.

‘Oku ‘i ai ‘a e tokolahi, te nau fai ‘enau filí ‘o ‘ikai te nau fakakaukau’i ‘a e tu’unga faka’Otuá, ka ‘oku nau pukepuke ‘e kinautolu ha fo’i faingamalie matu’aki fakapoto mo’oni ke nau homo he luo ‘oku fakatu’utāmaki. ‘Oku hanga ‘e he tohi Paloveape ‘o fakatokanga’i kitautolu, ko e ikuanga ki he kakai ‘oku nau ta’etokanga pe li’aki ‘a e ‘Otuá ‘i he’enau ngaahi fakakaukau, ‘oku fu’u fakatu’utāmaki ‘aupito. Kapau te ke hanga ‘o faka’atā koe ke fakatauele’i ki he angahala, pe ko e fiefia ‘o e momeniti ko iá, kuo pau te ke fepaki koe pea te ke utu ‘a e nunu’a ‘o e me’a ia ko ia. Ko ia, ‘oua ‘aupito te ke tuku ke fakahehema’i koe, pe fakavale’i koe.

Ko e ngaahi fehalaaki ko é na’a ke fa’a fai ‘i ho’o kei talavou, te ne lava ‘o tuli koe ‘i he toenga ho’o mo’ui. Kapau na’e fakahala’i koe ‘e he fe’auaki, ‘e tuli pe koe ‘i he taimi na’a ke fehalaaki ai ‘i ho’o kei si’i, ‘o a’u pe ki ho’o motu’a. Ko ia, te ke lava leva ‘o fai ‘a e fehu’i ko ‘eni. Pea ke hanga leva ‘o tali ‘a e fakamolemole, ka ko e nunu’a ‘o ho’o ngaahi fili (choices), ‘e tolonga pe ia ‘o ta’engata, pea he’ikai mate ‘a e fo’i patepate ia ko iá.

Ko ia ai, koehā ‘a e me’a te ke fai? ‘Oku hanga ‘e he ‘Otua ‘o pukepuke ‘a e fo’i fakafōtunga ‘o ‘Itaniti. ‘Oku ‘ikai ko e lolotonga ni, ka ko ‘Itaniti. ‘Oku ne ‘afio’i ‘a e me’a ‘oku lelei taha ki ho’o fiema’ú. Pea ke fakafalala leva ki he Laumale Ma’oni’oni, ke ne hanga ‘o fakatokanga koe ki he ngaahi fakaafe ‘oku fakatu’utamaki. Lotu faka’aho ma’u pe ki he ‘Otuá ke ne ‘oatu ha ivi mo ha malohi, ke ke ‘ikai. ‘O a’u pe ki ho ngaahi kaungame’a lelei taha. Ako ke ke ‘ikai!

Kainga, ‘oku fakatu’utāmaki ‘aupito ‘a e ngaahi kaume’a, tatau pe, pe ko hoto kaume’a lelei taha, ‘oku te tō ai ki he faingata’a. Ko e fakatokanga fakamuimui, kapau ‘oku ‘i ai ho ngaahi kaume’a ‘oku nau tu’u ma’u pe ke fakatanga’i koe ‘i he ngaahi ngaue ‘oku ke fai, ke ‘oua na’a ke fakalangilangi’i ‘a e ‘Otua, pea ‘oku ‘ikai leva ke ui ia ko ha ngaahi kaume’a. Ka ‘oku ‘i ai ha’o kaume’a ‘oku ne tu’u ke fakatanga’i mo fakaanga’i ‘a e Ngaue ‘a e Otua, mavahe koe pea mei ai. Pea ‘oku ui leva ‘e he Paloveape ‘a kinautolu ko e kau angahala. ‘Oua na’a ke tukulolo ki ai, ‘oua na’a ke ‘oange ha’anau faingamalie. ‘Oua na’a ke fakamoleki ho taimi pea mo kinautolu. Mavahe ‘i he vave taha!

TEFITO’I FAKAKAUKAU: Oua ‘aupito na’a ke feohi mo e kakai ‘oku nau fakafili ki he ngaue ‘a e ‘Otua pea nau lī ki lalo ‘a e ‘Otuá ‘i ho’o mo’uí.

Be the first to comment on "ME 7 TUSITE"

Leave a comment

Your email address will not be published.


*