ME 21 TUSITE

KO E FOHA POTO

Folofola ke lau: Paloveape 10:1-3

Veesi Tefito: Paloveape 10:1 “Ko e foha poto ko e fiefia’anga ‘o ‘ene tamai: Ka ko e tama vale ko e fakamamahi ‘o ‘ene fa’e”

Kainga ‘oku tau fanongo ‘i he lea ‘oku taka, ko kinautolu ‘oku fakafisi ke ako ‘oku hangehangē ka nau toe ha’u pe ‘o ako ha me’a tatau. ‘Oku ‘i ai ‘a e tokolahi ‘oku nau ta’ofi ha toe ako’i ha me’a meiate kinautolu kuo nau ‘osi pekia. ‘Oku nau fakapapau’i pe ‘e kinautolu ‘oku ‘i ai pe ‘a e fehalaaki ia na’a nau fai. Na’a nau fakafisi ‘a e poto ki he ngaahi me’a na’e a’usia pea foaki atu ‘e he’enau ngaahi matu’a, pea ko e me’a leva na’e hoko ‘i he’enau fakafisi ko ia, ne nau tō ai ki ha fakatu’utāmaki. Na’a nau matu’aki fakata’e’aonga’i pe ‘enautolu ‘a e ngaahi fakatokanga na’e ha’u pea meiate kinautolu ‘oku toe lelei ange ‘enau ‘ilo, pea ‘oku ‘uhinga ‘a e tohitapu ki he kalasi ko ia, “ko e fanau vale (foolish)”.

Ko e me’a fakamamahi taha ki he fanau ‘oku angatu’u, koe’uhinga ko ‘enau hanga ‘o tanumaki mai ‘a e mamahi ke lahi, ki he si’i kakai ko ia ‘oku nau kolenga mo ako’i kinautolu ke nau hoko ‘o poto. Ko e angahala ‘i hono natula, ‘oku ne ‘omi ‘e ia ‘a e fakamamahi mo e lotomamahi, ‘o ‘ikai ngata pe ‘i he tokotaha faiangahala, ka kiate kinautolu foki mo e kakai kehé. Pea ko e nunu’a ‘o e angahala ‘oku taitaha ha’ane fakangatangata pe ki he tokotaha ko é ‘oku ne fai ‘a e angahala. Ko e ki’i finemui ‘oku ne fakakaukau ke ne foaki hono sino ke fa’iteliha ai ‘a e angahala, kuo hoko ‘o feitama pea toe foki pe ‘o hoko ko e fakakavenga ki he’ene matu’a. Pe ko e ki’i talavou ko ia, na’e tuli pea mei he ako, meimei fakaiku pe hono lekooti ki he ngaahi faihia, pea ne hanga leva ai ‘o uli’i ‘a e ongoongolelei ‘a hono famili. Pea ko e ‘uhinga ‘oku ui ai ‘a e fanau ko ‘eni, ko e valé, he ‘oku nau kui ki he ngaahi mamahi mo e ngaahi felangaaki ‘oku fakatupu ‘e kinautolu ‘oku nau ‘ofa ki ai.

Kainga, ko e ta’e’atamaí pe ‘oku ne hanga ‘o fakafisinga’i ‘a e fale’i fakapoto mei he’enau matu’a ‘oku nau ‘ofa kiate ia. ‘Oku nau holi ke nau fai pe ‘enau fakakaukaú, ‘o ‘ikai te nau fakakaukau’i ‘a e ngaahi nunu’a ‘e hoko kiate kinautolu, pea toe lavea ai mo e kakai kehé.

‘Oku ‘i ai ‘a e ngaahi fanau ‘oku nau ‘omi ‘a e fiefiá ki he mātu’a. ‘Oku nau fakahā ‘enau poto ‘aki ‘enau fakaongo ki he’enau mātu’a. Tatau pe, pe ‘oku nau ta’eloto ki ai pe ‘ikai, ka ‘oku nau fakaongo pe. Ko e ‘ofefine potó ‘oku ne mahino’i, ko ‘ene mātu’a ‘oku ne fai ‘ofa kiate ia. Ke tauhi mu’a honau sino ke ma’a pea mo faka’apa’apa’ia. Ko e foha poto, ‘oku ne tali ‘a e poto mei he’ene mātu’a pea ne hanga ‘o siofi ‘a ‘ene mo’ui ki ai, pea ne fai ia ‘o hoko ko e ikuna. Neongo ko e ngaahi me’a faingata’a ke ne fili ki ai. Ko e fanau poto ‘oku nau ‘omi ‘a e langilangi ki honau famili.

Ko e fehu’i, ko e fē ‘a e kalasi ‘oku ke tō ki ai ho’o fili? ‘Oku ke ‘omi ‘a e fiefia ki ho’o mātu’a? ‘Oku ke hanga nai ‘o fakatokanga’i ange ‘a e mamahi ‘oku fakatupu ‘e kinautolu? Mahalo pe ‘oku ke fiema’u ke ke kole ha fakamolemole mei ho famili, pea kamata leva ke ke faka’apa’apa’ia’i kinautolu he ‘aho ni.

TEFITO’I FAKAKAUKAU: ‘Oua te ke faka’atā koe ke ke sītu’a pea mei he fale’i ‘a e mātu’a pe ko e kakai ‘oku matu’otu’a mo poto, ka ke muitala ‘o ke fakaongo ki ai, he ‘e hoko ia ko e koto langilangi’ia ho famili mo ho mātu’a.

Be the first to comment on "ME 21 TUSITE"

Leave a comment

Your email address will not be published.


*