ME 26 SAPATE

KO E ‘OFÁ MO E ANGAHALÁ

Folofola ke lau: Paloveape 10:1-12 Veesi Tefito: Paloveape 10:12 “Ko e taufehi’a ‘oku fakatupu kē; Ka ko e ‘ofa ‘oku ne fakakofu ‘a e fa’ahinga angahala kotoa pe”

‘Oku ‘ikai ke ‘i ai ha me’a te ne hanga ‘o ‘omai ‘a e fakamo’ui ki ha taha na’a ne tō ki he angahala, ka ko e ‘ofá. Na’e fili ‘e he ‘Otuá ke huhu’i ‘a e mamani angahala ko ‘eni, ‘o ‘ikai ‘aki ‘ene tautea’i kitautolu kae ‘aki ‘ene ‘ofa’i kitautolu, pea ne hanga ‘o foaki hono ‘Alo tofu pe ‘e taha ke mate koe’uhi ko kitautolu (Sione 3:16).

Ko ia ai, ‘oua na’a toe fakafuofua pe fakasi’isi’i ‘a e lahi ‘a ho’o ofa’i ‘a e kakai ‘oku ‘ikai ke faingofua hono ofa’i. Ko ho’o ‘ofa, te ne lava ‘o tokoni’i ha taha ‘oku ne lolotonga mafasia ‘i he angahala. Ko e taimi ka kūmoá ha kaume’a ‘e he angahala, ‘oua te ke hola mei ai, ‘o ke hanga ‘o lau’i ia. Tukuange ia, fekumi ki ha founga te ke hanga ai ‘o toe fokotu’u ai ia mo tokoni’i ke mo’ui. Tokoni’i ia ke fakamelino kiate kinautolu kuo ne faikovi ki ai. Fakalotolahi ia ke ne falala ki he ‘ofa ta’efakangatangata ‘a e ‘Otua.

‘Oku ‘i ai ha taha ‘oku ne fai angahala atu kiate koe. ‘E fēfē leva ha’o tali? Me’a ni nai te ke fakafisinga’i ke ke fakamolemole’i, pe te ke toe sauni ‘i ho’o ‘ita? Te ke hanga leva ‘e koe ‘o maumau’i ho’omo kaume’a? Me’a ni te ke hoko hoko atu ai pe ho’o hanga ‘o fakae’a ‘ene fehalaaki. ‘Oku ‘ikai ke pehē ‘a e ‘ofa ia.

Ko e ‘ofá ia ‘oku ne fakamolemole. Ko e ‘ofá ia ‘oku ‘ikai kūmoa ‘e ia ia ‘a e fo’i tonounou na’e hoko. ‘Oua na’a ke pipiki ki he kovi na’a ne fai mai, ‘o ke toe ‘ai ia ke toe ongo’i halaia lahi ange. Ko e ‘ofa ‘oku ne foaki ‘e ia ha toe faingamalie ki he tokotaha ko é. Ko e ‘ofa ‘oku ne foaki ‘e ia ‘a e lelei tahá kiate kinautolu ‘oku nau fai angahala mo fakafepaki kiate koé. Ko e ‘ofa mo’oni ‘oku ne fakamolemole’i ‘a e angahala. ‘Oku ‘ikai ko e angahala ‘uluaki pe, ka ‘oku hokohoko mai pe mo e angahala ‘o e taimi ni.

‘I he taimi na’e fakafehu’i ai, pe koehā ē lahi ‘o e fakamolemole ‘e fai ki ha tokotaha ‘oku ne fai kovi kiate koe, pea ko e tali ‘a Sisu, fitungofulu liunga fitu. Pea ko hono ‘ai ‘e taha, ‘oku ‘ikai ha fakangatangata ki he fakamolemole.

Kapau leva ‘oku ‘i ai ha’o ngaahi kaume’a ‘oku nau lolotonga faingata’a’ia koe’uhingá ko e nunu’a ‘o ‘enau ngaahi angahala, koehā hono ‘uhinga ‘oku ‘ikai te ke a’u atu ai ki ai ‘i he ‘ofá ‘i he ‘aho ni ‘o tokoni’i kinautolu ke nau ma’u honau fakamo’ui? Tukuange ‘e koe ‘a e faifakamaau ki he ‘Otua. Ko e me’a ‘oku kole mai kiate koe, ke ke ‘ofa ki he kakai kehe ‘i ho ‘atakaí.

TEFITO’I FAKAKAUKAU : Tatau pe koehā ‘a e angahala ‘oku fai mai kiate koe, ko e tu’utu’uni, ‘ofa kiate kinautolu ‘o hange ko ia na’e fai ‘e Sisu ‘i he kolosi, ‘o ne ikuna’i ia ‘aki ‘a e ‘OFA ‘ata’atā pe.

Be the first to comment on "ME 26 SAPATE"

Leave a comment

Your email address will not be published.


*