ME 28 TUSITE

KO E FAKAPIKOPIKO

Folofola ke lau: Paloveape 12:26-13:1-2 Veesi Tefito: Paloveape 12:27-28 “Ko e fakapikopiko ‘e ‘ikai te ne tunu ‘ene ‘a’alu: Ka ko e koloa mahu’inga ki ha tangata ‘a e anga vivili. ‘Oku nofo ‘i he hala ‘o e faitotonu ‘a e mo’ui: Pea ko e fou atu ‘i he alunga ko ia ‘oku ‘ikai ha mate”

‘Oku mahino nai kiate koe ‘a e lau ‘a e fo’i veesi ko ‘eni. Ko e tokotaha fakapikopiko ‘e ‘ikai tonu ‘ene ‘a’alu. ‘Oku ‘uhinga ‘a e ‘a’alu, ko e kakano’i manu ia ‘oku ne ma’u mai. ‘Oku fu’u fakapikopiko ia ke ne fai ha kuki pe tunu, ‘oku kai mata’i pe ia. Fakailifia é?

Ko e taimi ‘e taha ‘oku tau fakakaukau ki he fakapikopikó, ko ha fa’ahinga ‘ulungaanga ia ‘oku ma’u pe ‘e ha tangata, pe ko ha fa’ahinga mo’ui pe ia, ‘o laka ange ia ‘i he angahala. Kae fakatatau ki he tohitapu, ko e fakapikopiko ia ko e angahala. ‘Oku ‘ikai ke toe si’i pe lahi ‘i he angahala. Ko e lau ‘a e tohitapu, ko e fakapikopiko, ko e angahala. Ko ia ‘oku mahu’inga kiate kitautolu, ke tau tokanga’i na’a ko e kakai kitautolu ‘oku tau ‘efihia ‘i he fakapikopiko, ko e kakai ‘oku fai angahala.

Ko e ngaahi me’a ‘i he mo’ui pe kau ki he mo’ui, ‘e hoko mai pe kiate koe mo au ‘i he ngaue malohi. ‘ Oku lahi faufau ‘a e me’a ‘oku fiema’u ‘e he ‘Otua ke ke fai ‘i ho’o mo’ui pea fakafou atu ‘i ho’o mo’ui. ‘Oku ‘ikai te ne fiema’u ke ke tomui ‘i he me’a ko ia. ‘Oku ‘i ai ‘a e ngaahi faingamalie ‘oku nau ha’u tātu’otaha pe, pea kapau leva ‘oku ke fu’u tuai ke ke tali ki ai, pe ‘oku ke fu’u ta’etokanga, ki he ngaue ki ai ‘i ho’o mo’ui, te ke tomui pea te ke miss ‘a e ‘uni me’a mahu’inga ko iá.

Kuo ‘osi hanga ‘e he ‘Otua ‘o ‘omi ki he kakai ‘oku nau ‘atakai’i koe pe ‘oku mou kaunganofo, ‘oku nau fiema’u koe ke ke matu’aki fakakaveinga ‘a e anga ho’o mo’uí. ‘Oku ‘i ai ‘a e ni’ihi ‘oku ki’i si’isi’i mo iiki ange ia ‘iate koe, ‘oku ‘ikai te ne ‘ilo ‘e ia ‘a e anga ‘o e nofo ‘i he mo’ui ‘oku fiema’u ‘e Kalaisi, pea ke hoko leva koe ko e tā sipinga mo’oni. Pea ‘oku ‘i ai ‘a e kakai ‘i ho ta’u ‘oku nau matu’aki fu’u fiekaia ki ha fo’i lea fakalotolahi. Mahalo pe ko e taha koe ‘o honau ngaahi kaume’a ke ke foaki atu ‘a e fakalotolahi kiate kinautolu.

‘Oku ‘i ai ‘a e kakai he ta’u kotoa pe mei ‘olunga ki lalo, ‘oku nau fiema’u ke nau a’usia ‘a e ‘ofa ‘a Kalaisi ke ke foaki kiate kinautolu. Faka’atā ‘a e ‘Otua ke ngaue’aki ho’o mo’uí ki ha fo’i taimi pe, ka ke fakapikopiko koe ‘i he toenga ho taimi, pea ‘ikai te ke fai ia ‘i he taimi tatau ke ngaue ‘aki koe ‘e he ‘Otua pea ke toe fakapikopiko ‘i he taimi tatau pe. ‘Oku ta’emalava ia.

Na’e pehē ‘e Sisu, na’a ne hoko mai ke foaki kiate koe ‘a e mo’ui pea ke mou ma’u ia ‘o lahi ‘aupito. Ko e fakapikopiko ko e tauhele ia te ne hanga ‘o kaiha’asi koe mei ho’o fai ‘a e lelei tahá pea mo ho’o foaki ‘a e mo’ui ‘oku totonu ke ke foaki. Kaekehe, fai ‘aki ho’o fakakaukau lelei, ke ke tulituli ki he ma’oni’oni, pea te ke a’usia leva ‘a e mo’ui ‘oku ‘amanaki mai ‘a e ‘Otua ke ke hanga ‘o ma’u pea ke ke a’usa ia.

TEFITO’I FAKAKAUKAU: Ofo leva ‘o ke ‘ā ‘o ngaue he ‘oku falala mai ‘a e ‘Otua kiate koe. ‘Oua te ke tuku ‘a e me’a ‘oku ne tuku atu ke ma’u ia ‘e he kakai kehe, koe’uhinga ko ho’o fakamohemohe ‘i ho’o mo’ui.

Be the first to comment on "ME 28 TUSITE"

Leave a comment

Your email address will not be published.


*