ME 29 PULELULU

LE’OHI HO NGUTU

Folofola ke lau : Paloveape 13:1-11 Veesi Tefito: Paloveape 13:3 “Ko ia ‘oku ne lama hono ngutu ‘oku ne malu’i ‘ene mo’ui: Ka ko e ngutu mafa’a ko e tu’utamaki’anga kia kita. Ko e koto holinoa ‘a e mo’ui ‘a e makau: Ka ko e mo’ui ‘a e nima tutui ‘oku nge’ege’e”

Kainga, ‘i he’etau sio ki he veesi ko ‘eni, ‘oku tau manatu’i ‘a e taha ‘o e ngaahi Paloveape ‘a e kau Siapani, ‘oku nau pehē, ko e tokotaha fakalongolongo, ko e lelei taha ia ki he fakafanongo.

Ko hotau to’utangata ‘oku ‘ikai te nau lava ‘e kinautolu ‘o matu’uaki ke fakalongolongo. ‘Oku nau sai’ia ange ke nau fakafonu é ‘ea ‘aki ‘enau talanoa ta’efaka’Otuá mo e talanoa ta’e’atamai ‘i he’enau katekina ke nau fakalongolongo hifo. ‘Oku fa’a vave ma’u pe ke tau lea, pea tau toki fakakaukau ki mui, ka kuo mao ‘a e lea ia kuo ‘osi fai ki mu’a.

Ko e taimi ‘e ni’ihi, ‘oku tau pehē ko e ngaahi lea pe ia ‘oku tonu ke tau fanongo ki ai, ‘a e ngaahi lea ko ia ‘oku ha’u tokua mei hotau ngutu. Ka ‘ikai ke lava ke tau fakalongolongo hifo ‘o fakafanongo ki hotau ngaahi maheni. Ka ‘oku tau ngaue’aki ‘a e ngaahi lea ke tau puna ai mei he me’a ‘oku totonu ke ta’ofi ‘i hono fakahaa’i ‘etau ngaahi fakakaukau. Pea a’u ai pe ki he’etau ngaahi fakakaukau lelei tahá, ‘e lava pe ke fetongi vave ‘aki ia, ‘a e puna hake ‘etau fo’i lea ta’emata’ofi.

Hange ko e sipinga ko ‘eni, ‘e hoko mai ha’o maheni ke ne vahevahe ho palopalema. Pea kuo puna hake kiate kitautolu ‘a e ngaahi akonaki kovi, ta’e te tau fakakaukau ‘a hono tali ‘o e palopalema ko ia. Pea ‘ikai ‘aupito te tau fakatomala ‘i he’etau ngaue hala ‘aki ‘a e taimi ke tau fakakaukau’i ha me’a te ‘eki te tau fai ha lea. Pe koeha nai hono lahi ‘etau fa’a lea ‘aki ha ngaahi me’a ‘oku fakatupu mamahi pe fakatupu lavea ‘i he momeniti ko ia.

Ko e lea ta’etokangá, ko e lea ia ‘oku ta’efakakaukau’i. ‘Oku mafai lahi ange ia ke ne fai ha maumau lahi ‘aupito. ‘Oku ‘i ai hono ivi ke ne fakalavea’i ‘a e kakai kehé, ke ne fakamā’i ‘a e kakai kehé. ‘Oku hangē ia ha vavae ‘o ha pilo ‘oku tau tuku atu ke ifi ‘e he matangí, pea ta’emalava ke tau hanga ‘o tānaki mai ‘a e vavae ko ia kuo puhi ‘e he matangi, ‘o ‘alu lau lau maile, pea ‘oku ta’emalava ke tau toe hanga ‘o fakalelei, pe fakafoki mai ‘a e ngaahi lea fakalavelavea kuo homo mei hotau ngutú.

Kae ‘osi ko iá, ‘oku ‘i ai pe ho’o malu’i mei ho’o toe fakatomala he me’a ‘oku ke ‘osi lea ‘akí. Pea ‘oku ui ia ko e fakalongolongo. Ko e fakalongolongó ko e me’a malu’i lelei ia ‘o ‘etau fakalavea’i ‘a e kakai ‘i he’etau ngaahi leá.

Ko e taimi pe ka hoko mai ai ‘a e ‘ahi’ahí kiate koe ke ke lea ta’e fakakaukau’i, pe te ke lea ‘aki ha ngaahi lea ‘oku ta’e’ofa, pea ‘oku totonu mo taau leva he taimi ko iá, ke ‘oua na’a ke toe lea.

Ko e fakalongolongó, te ne hanga ‘o tokoni’i koe ke ‘oua te ke toe fakalavea’i ho fanga tokoua mo ho ngaahi kaume’á.

TEFITO’I FAKAKAUKAU : Ako ke ke fa’a fakalongolongo, kae lahi ange ke ke fakafanongo, he ko e hala ia ki he potó pea mo e hala ia ke ta’ofi ‘a e lavelavea mo e loto mamahi.

Be the first to comment on "ME 29 PULELULU"

Leave a comment

Your email address will not be published.


*