ME 31 FALAITE

KO E FAKAANGA ‘OKU LANGAHAKÉ

Folofola ke lau : Paloveape 13:18-25 Veesi Tefito: Paloveape 13:18 “Ko e masiva mo e mā ko e ‘inasi ia ‘o e toko taha ‘oku teke’i akonaki: Ka ko ia ‘oku tokanga ki he fakapoto ‘e fakahikihiki’i”

‘Oku fu’u malu ‘aupito ke tau fakakaukau ki he fo’i me’a ko ‘eni, ‘oku ‘ikai ke ‘i ai ha taha ‘e haohaoa. Kaekehe, ngalingali pe ‘oku malu ange ke te pehē ‘oku fu’u taumama’o ‘aupito ‘a koe mei he haohaoá, pea ‘i ho’o fokotu’u ha lea pehē kiate koe, te tau faka’osi ‘aki, ‘oku ke fiema’u leva ‘e koe ‘a e tokoni kotoa pe. Kae’oua mu’a te ke lotosi’i. Kiate kitautolu kotoa pe, ‘oku tau taumama’o mei he haohaoá pea ‘oku tau fiema’u ha tokoni. Pea ko e vave ange ‘a hono fakatokanga’i ‘a ‘etau fiema’u ha tokoni, ko e saiange ia ‘a e me’a te tau a’usia ‘i he’etau mo’ui.

‘Oku ‘ikai ke fiemalie ‘a e ‘Otua ke tau nofo ai pe, ko e kau pēpē fakalaumalie kitautolu, ‘o ‘ikai ke tau tupu. ‘Oku fiema’u ‘e he ‘Otua ‘a kitautolu takitaha ke tau hoko ko e kau matu’otu’a fakalaumalie (Matiu 5:48). Ke ‘omi ‘a e matu’otu’a fakalaumalie kiate kitautolu, te ne ‘omi leva ha ngaahi faingamalie ke tau tupu ai, pea ko e fehu’i leva. Te tau lava nai ‘o ngaue ‘aonga ‘aki ‘a e faingamalie ko iá? Meimei ko ‘etau ‘afungi mo ‘etau ongo’i ta’epau, ‘oku ne hanga ‘o malu’i kitautolu mei he’etau ako ‘a e ngaahi lesoni ‘oku tau fiema’u ke tau akó. Pea ka tau ka fakafisinga’i hono fakatonutonu ‘o kitautolu, te tau hangē pe ko e tangata ta’epotó, ‘a e fakafisinga’i ‘e he tangata lele he sipoti ke fakaongo ki he’ene fakamaau, pe ko e fakaongo ‘a e tamasi’i ako ke fanongo ki he’ene faiakó.

Kainga, kuo ‘osi hanga ‘e he ‘Otua ‘o ‘omi ha kakai ‘i he’etau mo’uí, ‘oku nau poto ange kinautolu ‘iate koe pea mo au. Pea ko e kakai ko iá ‘oku ‘osi ‘omi, ke ne hanga ‘o tokanga mo tauhi koe. Kapau leva te ke fakafisinga’i ‘a e fale’i ‘a e kakai ko iá, koe’uhi he ‘oku ke ongo’i ‘e koe ‘oku ke mahu’inga ange koe, pea ‘oku ke toe poto ange koe, teu talaatu kiate koe, te ke ta’etupu ai pe, ‘o ta’e matu’otu’a ‘i ho’o mo’ui ke ke ofi ki he me’a ‘oku fiema’u ‘e he ‘Otuá koe ki ai.

Ka kapau leva te ke poto fe’unga, ‘o ‘ikai ngata pe ‘i ho’o fakaongo ki he fale’i lelei, ka ke toe fekumi ki he ngaahi fakaanga ‘oku langa hake mei he kakai ‘oku ke faka’apa’apa’ia ‘o ke fakamoleki ha’o taimi mo ha ngaahi miniti ho’o fakaongo ki he’enau fale’i fakapotopotó, te ne hanga leva ‘o malu’i koe mei he ngaahi ta’u ‘o e mamahi he kaha’ú.

Ko e filí (choice) ‘oku ‘iate koe ‘ata’atā pe. ‘E lava pe ke ke feinga ke ke hanga ‘o fika’i ha ngaahi me’a ‘i ho’o fakakaukau, pe te ke falala ki he ‘Otua, ‘oku ne ‘ilo ‘a e lelei taha pea ma’au.

TEFITO’I FAKAKAUKAU: Fakaongo ki he kakai ‘oku ‘omi ‘e he ‘Otuá ho va’ihala ke nau tokoni’i koe, pe te nau fakaanga’i koe, ka ‘e tupu ai ho’o mo’uí, ‘o toe lahi ange ‘o ke a’u ‘o matu’otu’a ‘o fakatatau ki he fokotu’utu’u ‘a e ‘Otuá ki ho’o mo’uí.

Be the first to comment on "ME 31 FALAITE"

Leave a comment

Your email address will not be published.


*