SUNE 19 PULELULU

‘OUA NA`A KE FIEFIA

Folofola ke lau:Palovepi 24: 17-27

Veesi Tefito:Palovepi 24 : 17-18

“`Oua te ke fiefia he toka ho fili’, Pea `oua na`a tome`e ho loto `i he`ene
mafuli: Na`a sio ki ai `a Sihova, pea tau kovi ki hono finangalo’, `O ne le`ei
hono houhau’ meiate ia.”
Ko e ha `a e `uhinga ke `oua te te fiefia?

`Oku fakamatala `a e tohi tikisinali’
`oku `uhinga ko ia’ `oku `ikai ko e fiefia tu`unga `i ha tokotaha `oku `ikai `i ai
hano monu`ia, pea `oku tau sio leva ki ai’ pea `oku hange `oku momoko hotau
loto.

Hange `oku ne hanga `o li ki lalo `a hotau `ulungaanga ke tau fiefia tokua
koe`uhinga ko ho tau fili `oku to ki he faingata`a pe mamahi fu`u.

Ka ko e fehu`i’ `e fefe leva kapau ko e tokotaha koee’ `oku faingata`a`ia’ kuo
hoko mai; fefe kapau ko e tokotaha ia na`e tupu mei ai `a e langa mo e mamahi
mo ne fakatupu `a e kovi ki ho`o mo`ui?

`E fefe kapau leva te tau kumi ia ke
tau hanga `o fai ha me`a ki ai, kae to e totongi mai `e ia `a e fo`i kovi ko ia,
he`ikai ko e me`a fakanatula pe ke tau kumi ha fanga ki`i me`a fakaikiiki ke
fakafiemalie. Lolotonga ko ia’ ko ho fili `au kuo ne ma`u `e ia ia `a e tuha tonu
`a e kovi na`a ne fai’.

Kuo `osi hanga `e Sisu’ `o `omai ha tu`unga ma`olunga kiate kitautolu ke fai`aki
`etau tauhi ki he kakai `oku nau hanga ‘o fakalavea`i kitautolu’ pe fakamamahi
kiate kitautolu. Ka `oku `ikai ke kau ai `a e fiefia ia mo e kata`i’. Na`e `ilo `e Sisu’
ko e fakamaau ia kuo `osi fai.
Ko ia ai `oku `ikai ke to e `i ai hano totonu `ona ke tau to e fai ia `etautolu. Ko ia
ai ko e fekau `a Sisu kiate kitautolu’ ke tau tali`aki é ngaahi mamahi ko ia’ mo e
ngaahi fakalavea loto ko ia’ `aki `a e `ofa, `aki `a e lotu, `aki `a e fakamolemole`i
kinautolu `oku nau faikovi mai;

(Matiu 5: 43-45)Kuo mou fanongo na`e folofola`aki, Te ke `ofa`i ho
kaunga`api’, kae fehi`a ki ho fili’: Ka `oku ou tala kiate kimoutolu `e au, Mou
`ofa`i homou ngaahi fili’, pea hufia `a kinautolu `oku nau fakatanga`i
kimoutolu’.Koe`uhi’ ke mou hokosi ho`omou Tamai `oku `i Hevani’: he `oku
ne fakahopo `ene la`aa’ ki he kovi’ mo e lelei’, pea `oku ne faka`uha ki he
faitotonu’ mo e faihala’.
Ko e kau tama `oku kei loto fefeka’ `a `enau tali’ `o kau ki he ngaue `a e fili’ kiate
kita’ `oku ne kei fakahaa`i `e ia ko kitautolu foki `oku kei fonu fili`ia pe hotau
loto’, pea `oku kei kovi pe `o te`eki ke liliu hotau loto.

`Oku ne fakahaa`i `oku
`ikai ke tau to e saiange kitautolu he tokotaha ko ia na`a ne fakalavea`i kita.
Ko e `aho ni `oku fakatokanga mai `a e tohi Palovepi’ ko `etau tali koee’ `oku
kovi, pe `oku tau katakata`i’, pea tau fakamaito`a `i he me`a kuo to ki ai hotau
fili’ `a ia ko e si`i fili ko ia’ kuo alasi `e he `Otua `o ako`i `a e tokotaha ko ia’
pea` e hanga leva `e he `uuni me`a ko ia’ `o fakatupu `a e `Otua’ ke ne hanga `e
ia `o tukuange hoto fili’ `o tau`ataina kae tafoki mai ia `o ako`i kita. Ko hono
kovi ia `e te katakata`i fakamaito`a he to `a e tokotaha na`e fili mai.

Kapau leva `oku ke kei fiefia koe ko e `uhinga’ ko ha tokotaha kuo ne to ki ha
fakatu`utamaki ko e `uhinga’ ko `ene fai kovi atu kiate koe’; fakavave leva ke
ke kumi `a e fakamolemole `a e `Otua pea ke kole ki ai ke tokoni`i koe ke sio ki
ho fili `i he `ofa mo e fofonga `ofa `o Sisu Kalaisi. Ko e taimi `oku ke sio ai ki ha
tokotaha `i he fofonga `o hange ko e sio `a e `Otua’ ki he tokotaha ko ia’ he`ikai
leva ke ke to e kata fiefia he tō ho fili.

TEFITO`I FAKAKAUKAU: `Oua te ke fiefia he tō ho fili `o ke fakamaito`a ki ai’,
telia na`a `ilo `e he `Otua’ pea ne tukuange `e ia `a e tokotaha ko ia’ ka ne
hiki atu ia kiate koe `a `ene faiako.

Be the first to comment on "SUNE 19 PULELULU"

Leave a comment

Your email address will not be published.


*